(សៀងហៃ)៖ គណៈកម្មាការពន្ធគយនៃក្រុមប្រឹក្សារដ្ឋចិន បានឱ្យដឹងនៅថ្ងៃអាទិត្យនេះថាទីក្រុងប៉េកាំង បានផ្អាកការដំឡើង ពន្ធបន្ថែមលើផលិតផលមួយចំនួននាំចូលពីសហរដ្ឋអាមេរិក បន្ទាប់ពីមហាអំណាចសេដ្ឋកិច្ចទាំងពីរបានព្រមព្រៀងគ្នាលើ កិច្ចព្រមព្រៀងពាណិជ្ជកម្មតំណាក់កាលទី១ កាលពីថ្ងៃសុក្រ។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃអាទិត្យ ទី១៥ ខែធ្នូ ឆ្នាំ២០១៩។

ការដំឡើងពន្ធបន្ថែមរបស់ចិន ជាការឆ្លើយតបទៅនឹងសហរដ្ឋអាមេរិក ដំបូងឡើយត្រូវចូលជាធរមាននៅថ្ងៃទី១៥ ខែធ្នូនេះ ហើយវិធានការនេះទៀតសោតគឺមានគោលដៅលើផលិតផលនាំចូលពីអាមេរិក ក្នុងនោះមានចាប់ពីពោត រហូតដល់រថយន្ដ និងគ្រឿងបន្លាស់រថយន្ដ។ គណៈកម្មាការពន្ធគយនៃក្រុមប្រឹក្សារដ្ឋចិន បានគូសបញ្ជាក់ដូច្នេះថា៖« ឈរនៅលើមូលដ្ឋាន ស្មើភាព និងការគោរពគ្នាទៅវិញទៅមក ជាមួយសហរដ្ឋអាមេរិក ចិនសង្ឃឹមថាអាចនឹងដោះស្រាយបញ្ហាជាក្ដីកង្វល់រវាងគ្នា ទៅវិញទៅមក ក៏ដូចជាលើកកម្ពស់ការអភិវឌ្ឍប្រកបដោយស្ថេរភាពនៃទំនាក់ទំនងសេដ្ឋកិច្ច និងពាណិជ្ជកម្មអាមេរិក-ចិន»។

គួរជំរាបថា កាលពីថ្ងៃសុក្រកន្លងទៅ មន្ត្រីចិនបានបង្ហើបឲ្យដឹងថា កិច្ចព្រមព្រៀងពាណិជ្ជកម្មតំណាក់កាលទី១ ដែលត្រូវបានពិភាក្សាគ្នារវាងមន្ត្រីអាមេរិក និងចិននោះត្រូវបានភាគីទាំងពីរសម្រេចជាថ្មីថា នឹងចុះហត្ថលេខាយកជាផ្លូវការតែម្តង នៅដើមឆ្នាំ២០២០ ដោយក្នុងនោះសហរដ្ឋអាមេរិកសន្យាមិនដំឡើងពន្ធបន្ថែមលើទំនិញចិន និងដកការរឹតត្បិតមួយចំនួនទៀត ហើយចិនវិញសន្យាបង្កើនការទិញទំនិញកសិកម្ម ពីអាមេរិក ៥០ពាន់លានដុល្លារ ដែលច្រើនជាងកាលពីឆ្នាំ២០១៧ រហូតដល់ទៅ២ដង៕