(ម៉ូស្គូ)៖ រដ្ឋបាលប្រធានាធិបតីអាមេរិក លោក ដូណាល់ ត្រាំ នឹងប្រកាសពីការដកកងទ័ពអាមេរិក ៤,០០០នាក់ ចេញពីប្រទេស អាហ្វហ្គានីស្ថាន នៅសប្ដាហ៍ក្រោយនេះ ខណៈកិច្ចចរចារស្វែងរកសន្តិភាពរវាងអាមេរិក និងក្រុមតាលីបង់ កំពុងចាប់ផ្ដើម​ឡើងវិញជាថ្មី។ នេះបើតាមការចេញផ្សាយដោយសារព័ត៌មាន CNN នៅថ្ងៃអាទិត្យ ទី១៥ ខែធ្នូ ឆ្នាំ២០១៩។

សារព័ត៌មាន CNN ធ្វើសេចក្ដីរាយការណ៍ខាងលើ ដោយផ្អែកលើប្រភពពីមន្ត្រីជាន់ខ្ពស់អាមេរិកម្នាក់ ក្នុងលក្ខខណ្ឌមិនបញ្ចេញ ឈ្មោះ។ មន្ត្រីរូបនេះដដែល បានបញ្ជាក់ទៀតថា ក្រោយការដកកងទ័ព ៤,០០០នាក់ កងទ័ពអាមេរិកចន្លោះពី ៨,០០០ ដល់៩,០០០នាក់ នឹងបន្តឈរជើងនៅក្នុងប្រទេសអាហ្វហ្គានីស្ថាន ហើយការដកកងទ័ពនេះទៀតសោតអាចនឹងត្រូវធ្វើឡើង ជាដំណាក់កាលក្នុងរយៈពេលជាច្រើនខែ។

គួរបញ្ជាក់ថា ខាងសេតវិមានមិនទាន់ធ្វើការអត្ថាធិប្បាយអ្វីពាក់ព័ន្ធនឹងសេចក្ដីរាយការណ៍របស់ CNN នៅឡើយទេ តែលោក ដូណាល់ ត្រាំផ្ទាល់ ធ្លាប់បានអះអាងជាច្រើនលើកថាមានបំណងដកកងទ័ពអាមេរិកជាច្រើនពាន់នាក់ចេញពីអាហ្វហ្គានីស្ថាន ជាទីដែលកងទ័ពអាមេរិកចន្លោះពី១២,០០០នាក់ ដល់១៣,០០០នាក់ កំពុងឈរជើងជួយរដ្ឋាភិបាលទីក្រុងកាប៊ុល ប្រយុទ្ធ ជាមួយក្រុមសកម្មប្រយុទ្ធតាលីបង់ ក្នុងសង្រ្គាមរុំារ៉ៃអស់រយៈពេលជាង១៨ឆ្នាំមកនេះ៕