(បាងកក)៖ មន្រ្តីរាជការ ប៉ូលិស និងគ្រូបង្រៀន កំពុងត្រូវបញ្ជូនជាបន្តបន្ទាប់ទៅកាន់ជំរំបណ្តុះបណ្តាលនៅក្នុងប្រទេសថៃ ដើម្បីចូលរួមវគ្គហ្វឹកហាត់ក្នុងផ្នែកការងារសហគមន៍ និងការពង្រឹងភាពស្មោះត្រង់ចំពោះព្រះមហាក្សត្រ។ នេះបើតាមការដកស្រង់ការផ្សាយពីសារព័ត៌មាន CNA នៅព្រឹកថ្ងៃសុក្រ ទី០១ ខែវិច្ឆិកា ឆ្នាំ២០១៩។

យោងតាមអ្នកជំនាញមួយចំនួន កម្មវិធីបណ្តុះបណ្តាលខាងលើ ដែលត្រូវបានបង្កើតឡើងកាលពីឆ្នាំមុន គឺជាការរំលេចឲ្យឃើញពីរបៀប ដែលព្រះមហាក្សត្រថៃបច្ចុប្បន្ន គឺព្រះបាទ មហា វិជ្ជរ៉ាឡុងកន កំពុងតែពង្រឹងអំណាចរបស់ទ្រង់ នៅក្នុងសង្គមឲ្យកាន់តែរឹងមាំថែមទៀត។

បុគ្គលប៉ុន្មានរូបដែលបានបញ្ចប់វគ្គបណ្តុះបណ្តាលនេះ ដែលហៅថា «Volunteer Spirit 904» បានឲ្យដឹងថា វាមានភាពតឹងរ៉ឹងដោយពួកគេត្រូវងើបតាំងពីព្រឹកព្រហាមម៉ោង ៥៖០០នាទី ដើម្បីហាត់ប្រាណជាក្រុម ហើយតម្រង់ជួរគោរពតាមរបៀបរបបទាហាន មុនចូលដល់ម៉ោងសិក្សាអំពីប្រវត្តិសាស្រ្តនៃស្តេចថៃ និងហ្វឹកហាត់អំពីការងារសហគមន៍។

នៅចុងបញ្ចប់នៃកម្មវិធីបណ្តុះបណ្តាល ដែលជាទូទៅមានរយៈពេលចន្លោះពី ១៥ថ្ងៃរហូតដល់ ៦សប្តាហ៍ពួកគេត្រូវបានប្រកាសជា «Karatchakan Suan Pra-ong» ឬ «មន្រ្តីបម្រើអង្គព្រះមហាក្សត្រ» ដែលនឹងមានតួនាទីលើកកម្ពស់រាជានិយម ហើយកិច្ចប្រឹងប្រែងរបស់ពួកគេ ក៏នឹងត្រូវតាមដានជាប់ផងដែរ។

វគ្គបណ្តុះបណ្តាល 904 នេះស្ថិតក្រោមការសម្របសម្រួលរបស់រដ្ឋមន្រ្តី នៃការិយាល័យនាយករដ្ឋមន្រ្តីថៃលោក ធីរ៉ាផាត់ ប្រាយូរ៉ាសិទ្ធី (Theerapat Prayurasiddhi)។ បើតាមលោក Theerapat មនុស្សប្រមាណ ៣,០០០នាក់ហើយបានបញ្ចប់វគ្គបណ្តុះបណ្តាលនេះ ដែលគិតជាក្រុមគឺចំនួន ៥០០ក្រុម ចាប់តាំងពីខែមីនា ឆ្នាំ២០១៨ មកទល់នឹងពេលបច្ចុប្បន្ន ហើយវាគឺជាការស្ម័គ្រចិត្តសុទ្ធសាធ ដោយគ្មានការបង្ខិតបង្ខំឡើយ។

គួរជម្រាបថា បើតាមការយល់ឃើញរបស់ក្រុមអ្នកជំនាញមួយចំនួន ខណៈការគោរពយ៉ាងជ្រាលជ្រៅចំពោះព្រះមហាក្សត្រ គឺជាវប្បធម៌ដ៏យូរលង់ណាស់មកហើយរបស់ប្រទេសថៃនោះ ព្រះបាទ វិជ្ជរ៉ាឡុងកន ក៏កំពុងតែព្យាយាមធានានូវភក្តីភាពពីប្រជានុរាស្រ្តរបស់ទ្រង់ ក្នុងរបៀបដែលពុំធ្លាប់ឃើញពីមុនមកឡើយ៕