(វ៉ាស៊ីនតោន)៖ ក្រសួងការពារជាតិអាមេរិកបញ្ចកោណ បានសម្រេចកិច្ចព្រមព្រៀងចុងក្រោយហើយ ជាមួយក្រុមហ៊ុនផលិតសព្វាវុធឡុកឃីដម៉ាទីន (Lockheed Martin) ដើម្បីទិញយន្តហោះចម្បាំងត្រកូល F-35 Lightning II ដែលមានតម្លៃសរុប ៣៤ពាន់លានដុល្លារ។ នេះបើតាមប្រភពព័ត៌មានពីមន្ត្រីអាមេរិក ដែលសារព័ត៌មានចិនស៊ីនហួរ ដកស្រង់នៅរសៀលថ្ងៃពុធ ទី៣០ ខែតុលា ឆ្នាំ២០១៩។

ព័ត៌មានបានចេញផ្សាយទៀតថា នៅក្នុងកិច្ចព្រមព្រៀងខាងលើនេះមានយន្តហោះចម្បាំងប្រភេទ F-35A ចំនួន ៣៥១គ្រឿងសម្រាប់បំពាក់ឲ្យកងទ័ពអាកាស, យន្តហោះចម្បាំង F-35Bs ចំនួន ៨៦គ្រឿងសម្រាប់បំពាក់ឲ្យកងទ័ពប្រតិបត្តិការជើងទឹក និងយន្តហោះចម្បាំង F-35Cs ចំនួន ៤១គ្រឿងដើម្បីបំពាក់ឲ្យកងនាវាដឹកយន្តហោះចម្បាំង។

ដោយឡែកក្រៅពីយន្តហោះចម្បាំង ត្រកូល F-35 ខាងលើនេះ ក្រុមហ៊ុនអាមេរិក Lockheed Martin ក៏បានអះអាងផងដែរថា យន្តហោះទូទៅប្រមាណ ២៩១គ្រឿងទៀត នឹងត្រូវផលិតសម្រាប់ផ្គត់ផ្គង់ឲ្យរដ្ឋាភិបាលអាមេរិក, យន្តហោះចម្បាំង F-35 ចំនួន ១២៧គ្រឿងសម្រាប់បណ្តាប្រទេសជាដៃគូអាមេរិក និង F-35 ចំនួន ៦០គ្រឿងទៀតសម្រាប់យោធាបរទេស ដែលជាអតិថិជន។

គួរបញ្ជាក់ថា កម្មវិធីផលិតយន្តហោះចម្បាំង F-35 គឺត្រូវបានគាំទ្រដោយរដ្ឋាភិបាលអាមេរិក ហើយក៏ត្រូវបានចាត់ទុកជាសព្វាវុធ ដែលមានតម្លៃថ្លៃបំផុតប្រចាំប្រវត្តិសាស្ត្រផងដែរ។ ប៉ុន្តែមួយរយៈចុងក្រោយនេះ វាបានទទួលរងការរិះគន់ខ្លាំង ក៏ព្រោះតែការដំឡើងតម្លៃខ្ពស់ហួស និងការពន្យារពេលយូរក្នុងការប្រគល់ឲ្យអតិថិជន។ បើតាមមន្ទីរបញ្ចកោណអាមេរិក F-35 ចំនួន ៤៤០គ្រឿងហើយត្រូវបានបញ្ជូនទៅដល់ដៃ បណ្តាប្រទេសនានាលើលោកគិតត្រឹមឆ្នាំ២០១៩៕