(តូក្យូ)៖ ចំនួនមនុស្សស្លាប់ដោយសារតែព្យុះទីហ្វុងដ៏កំណាច Hagibis នៅក្នុងប្រទេសជប៉ុន បានកើនដល់១៦នាក់ហើយ ខណៈ១៥នាក់បាត់ខ្លួន និងជាង១៤៩នាក់ផ្សេងទៀតរងរបួស។ នេះបើតាមការចេញផ្សាយដោយសារព័ត៌មាន NHK នៅថ្ងៃអាទិត្យ ទី១៣ ខែតុលា ឆ្នាំ២០១៩។

សារព័ត៌មានជប៉ុន NHK បានឱ្យដឹងទៀតថា ជនរងគ្រោះទាំង១៦នាក់ខាងលើ ត្រូវបានគេរាយការណ៍ថាបានស្លាប់នៅក្នុង ខេត្ត Kanagawa, Tochigi, Gunma, Iwate, Miyagi, Fukushima, Chiba និងខេត្ត Saitama ខណៈចំនួនអ្នកស្លាប់ ត្រូវបានគេរំពឹងថាអាចនឹងបន្តកើនឡើង។

ព្យុះទីហ្វុង Hagibis ដែលត្រូវបានគេចាត់ទុកថាជាព្យុះដ៏កំណាចបំផុត ក្នុងរយៈពេលជាង៦០ឆ្នាំនេះ កំពុងបក់បោក ទៅកាន់ឆ្នេរភាគខាងកើតនៃប្រទេសជប៉ុន ជាមួយល្បឿន២២៥គីឡូម៉ែត្រ ក្នុងមួយម៉ោង បន្ទាប់ពីវាបានវាយប្រហារ លើតំបន់ដីគោក Izu ភាគអាគ្នេយ៍ទីក្រុងតូក្យូ កាលពីថ្ងៃសៅរ៍។ ព្យុះទីហ្វុង Hagibis ក៏បានបង្កជាគ្រោះទឹកជំនន់ និងរអិលបាក់ដី រីឯមធ្យោបាយធ្វើដំណើរនានា រួមទាំងជើងហោះហើរ នៅក្នុងស្រុកជាច្រើនត្រូវបានលុបចោល ឬផ្អាកជាបណ្ដោះអាសន្នផងដែរ។

គួរបញ្ជាក់ថា បើតាមអាជ្ញាធរជប៉ុន ផ្ទះច្រើនជាង២៧០,០០០ខ្នង គ្មានអគ្គិសនីប្រើប្រាស់ ហើយមនុស្សរាប់លាននាក់ ត្រូវបានជម្លៀសទៅកាន់កន្លែងមានសុវត្ថិភាព ស្របពេលអាជ្ញាធរជប៉ុន កំពុងបន្តប្រតិបត្តិការជួយសង្រ្គោះ និងស្វែងរក មនុស្សបាត់ខ្លួន។ ព្យុះទីហ្វុង Hagibis ត្រូវបានគេរំពឹងថានឹងបក់បោកទៅកាន់តំបន់សមុទ្រ នៅថ្ងៃអាទិត្យនេះ៕