(ញូដេលី)៖ អាជ្ញាធរឥណ្ឌាបានឱ្យដឹងថា មនុស្សច្រើនជាង ១២០នាក់បានបាត់បង់ជីវិត នៅក្នុងគ្រោះទឹកជំនន់ដែលបង្កឡើងដោយភ្លៀងធ្លាក់ខ្លាំង នៅក្នុងរដ្ឋយូតតាប្រាដែស (Uttar Pradesh) និងរដ្ឋប៊ីហា (Bihar) ភាគខាងកើតប្រទេស។ នេះបើតាមការចេញផ្សាយដោយ​សារព័ត៌មាន BBC នៅរសៀលថ្ងៃចន្ទ ទី៣១ ខែកញ្ញា ឆ្នាំ២០១៩។

យោងតាមអាជ្ញាធរឥណ្ឌាមនុស្ស ៩៣នាក់បានស្លាប់នៅក្នុងរដ្ឋ Uttar Pradesh និង ២៩នាក់នៅរដ្ឋ Bihar គិតចាប់តាំងពីថ្ងៃព្រហស្បតិ៍សប្ដាហ៍មុនមក។ ចំណែកឯផ្លូវដែក ផ្លូវថ្នល់ សាលារៀន និងការផ្គត់ផ្គងអគ្គិសនីក៏កំពុងរងការរំខានផងដែរ ដោយសារគ្រោះទឹកជំនន់ដ៏អាក្រក់នេះ។

គួរបញ្ជាក់ថា មកទល់នឹងពេលនេះក្រុមអ្នកជួយសង្រ្គោះឥណ្ឌា នៅតែបន្តធ្វើការងារជួយសង្រ្គោះរបស់ពួកគេនៅឡើយ ខណៈអាជ្ញាធរនៅក្នុងរដ្ឋទាំងពីរ បានស្នើឱ្យសុំជំនួយឧទ្ធម្ភាចក្រពីកងទ័ពអាកាសឥណ្ឌា ព្រមទាំងម៉ាស៊ីនបូមទឹកជាដើម៕