(ម៉ូស្គូ)៖ ក្រសួងការពារជាតិរុស្ស៊ីទើបតែបានបញ្ចេញឃ្លីបវីដេអូមួយ បង្ហាញពីការធ្វើសកម្មភាពហោះហើរសាកល្បងរួមគ្នារវាង យន្តហោះ​ដ្រូន​ធុនធំស៊េរីថ្មីហៅថា Hunter និងយន្តហោះចម្បាំងជំនាន់ចុងក្រោយបំផុតរបស់រុស្ស៊ីគឺ Su-57 ខណៈយន្តហោះ​ទាំងពីរសុទ្ធតែមានសមត្ថភាពបំបាំងកាយពីប្រព័ន្ធរ៉ាដាដូចគ្នា។ នេះបើតាមការដកស្រង់ការផ្សាយចេញពីសារព័ត៌មាន RT នៅ​រសៀលថ្ងៃចន្ទ ទី៣០ ខែកញ្ញា ឆ្នាំ២០១៩។

យោងតាមការបញ្ជាក់របស់ក្រសួងការពារជាតិរុស្ស៊ី​ បេសកកម្មហោះហើរសាកល្បងខាងលើ បានប្រព្រឹត្តទៅរយៈពេល៣០នាទី។ ប៉ុន្តែវាមិនមែនត្រឹមតែជាការបង្អួតបង្ហាញទទេរៗនោះឡើយ ព្រោះតាមរយៈការផ្គូផ្គងជាមួយយន្តហោះដ្រូន Hunter យន្តហោះចម្បាំង Su-57 អាចពង្រីកដែនគ្របដណ្តប់នៃរ៉ាដារបស់វា ហើយវាយប្រហារលើគោលដៅ ដោយពុំចាំបាច់ចូលទៅក្នុងតំបន់ប្រព័ន្ធការពារដែន​អាកាសរបស់សត្រូវឡើយ។

គួរជម្រាបថា យន្តហោះដ្រូន Hunter បានធ្វើតេស្តហោះហើរឡើងលើផ្ទៃអាកាសជាលើកដំបូង កាលពីខែសីហាកន្លងទៅនេះ ខណៈព័ត៌មានលម្អិតអំពីវាគឺមានតិចតួចបំផុត។ សេចក្តីរាយការណ៍ព័ត៌មាននាពេលកន្លងមក បានអះអាងថា យន្តហោះដ្រូន Hunter អាចហោះក្នុងល្បឿន Supersonic បាន (លឿនជាងល្បឿនសំឡេង) ហើយក្រៅពីការធ្វើបេសកកម្មស៊ើបការណ៍ វាក៏​​អាចផ្ទុកសព្វាវុធនៅក្នុងតួខ្លួនវាបានដែរ។

រីឯយន្តហោះចម្បាំង Su-57 ដែលជាយន្តហោះចម្បាំងជំនាន់ទី៥ដំបូងគេរបស់ប្រទេសរុស្ស៊ី បានធ្វើការហោះហើរជាលើកទីមួយ​កាលពីឆ្នាំ២០១០ ហើយវាធ្លាប់ត្រូវបានធ្វើតេស្តសមត្ថភាពប្រយុទ្ធរួចស្រេចមកហើយ នៅក្នុងប្រទេសស៊ីរី។ យន្តហោះចម្បាំង Su-57 ត្រូវ​គេ​រំពឹងថា នឹងចូលធ្វើប្រតិបត្តិការពេញលក្ខណៈនៅក្នុងជួរកងទ័ពអាកាសរុស្ស៊ី នៅមុនដំណាច់ឆ្នាំនេះ៕