(ហុងកុង)៖ ក្រុមអ្នកគាំទ្រនយោបាយទីក្រុងប៉េកាំងនៅថ្ងៃសៅរ៍នេះ បានប្រមូលផ្តុំគ្នាតវ៉ាប្រឆាំង ចំពោះក្រុមប្រឆាំងដែលកំពុងអុកឡុកទីក្រុងហុងកុង និងទាមទារឲ្យអាជ្ញាធរទីក្រុងសេដ្ឋកិច្ចធំបំផុតនៅអាស៊ីមួយនេះ ចាត់វិធានការទប់ទល់ទៅលើក្រុមបាតុករប្រឆាំង ដែលកំពុងតែប្រព្រឹត្តល្មើសច្បាប់។ នេះបើតាមការចេញផ្សាយដោយ Sputnik នាល្ងាចថ្ងៃសៅរ៍ ទី១៤ ខែកញ្ញា ឆ្នាំ២០១៩។

ក្រុមប្រជាជនហុងកុង ដែលគាំទ្រនយោបាយចិនដីគោកខាងលើនេះ បានប្រមូលផ្តុំគ្នានៅតាមដងវិថី ស្ថិតនៅពីមុខមជ្ឈមណ្ឌលបារាំងអន្តរជាតិ ប្រចាំនៅទីក្រុងហុងកុង ដើម្បីសម្តែងការគាំទ្ររបស់ពួកគេចំពោះនយោបាយចិនតែមួយ និងស្នើឲ្យអាជ្ញាធរហុងកុង​ចាត់វិធានការបន្ទាន់ ដើម្បីបញ្ឈប់សកម្មភាពល្មើសច្បាប់នានា និងឈានទៅរកការស្តារសណ្តាប់ធ្នាប់ នៃទីក្រុងស្វយ័តមួយនេះឡើងវិញ។

គួរបញ្ជាក់ថា បាតុកម្មដ៏កក្រើកបានកើតមានឡើង តាំងតែពីខែមិថុនាមកម្ល៉េះ ដោយក្រុមបាតុករដែលទីក្រុងប៉េកាំងចាត់ទុកថា មានបាតដៃទីបីជាអ្នកដុតរោលពីក្រោយ បានប្រមូលផ្តុំគ្នាប្រឆាំងនឹងច្បាប់ធ្វើបត្យាប័ន ហើយបើទោះបីកាលពីសប្តាហ៍មុននេះ អភិបាលទីក្រុងហុងកុងលោកស្រី ខារី​ ឡាំ បានសម្រេចចិត្តលុបចោលវាជាស្ថាពរក៏ដោយ ក៏ក្រុមបាតុករទាំងអស់មិនបន្ធូរដៃដដែល និងនៅតែព្យាយាមធ្វើបាតុកម្មជាបន្តទៀត ដើម្បីទាមទារឲ្យអភិបាលក្រុងរូបនេះ ចុះចេញពីតំណែង៕