(ម៉ូស្គូ)៖ កំឡុងមួយសប្តាហ៍កន្លងទៅនេះ យោធារុស្ស៊ីបានប្រទះឃើញយន្តហោះស៊ើបការណ៍របស់បរទេស ចំនួន១៧គ្រឿង មកហោះឆ្វែលក្បែរៗដែនអាកាសប្រទេសខ្លួន។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅព្រឹកថ្ងៃសុក្រ ទី០៩ ខែសីហា ឆ្នាំ២០១៩។
ជាវិធានការបង្ការ រុស្ស៊ីបានចល័តយន្តហោះចម្បាំង១២លើក ដើម្បីទៅស្ទាក់យន្តហោះបរទេសទាំងនោះ កុំឲ្យជ្រុលរំលោភ ចូល មកក្នុងដែនអាកាសរបស់រុស្ស៊ី ហើយក៏ពុំមានការឆ្លងចូលមកដោយខុសច្បាប់ដែរ។ យ៉ាងណាមិញ ហេតុការណ៍ស្រដៀងគ្នានេះ តែងកើតមានឡើងជាញឹកញាប់។
គួរជម្រាបថា កាលពីខែមុន យន្តហោះបរទេស១៨គ្រឿង ត្រូវបានប្រទះឃើញ កំពុងតែបំពេញបេសកកម្មស៊ើបការណ៍ នៅក្បែរ ដែនអាកាសប្រទេសរុស្ស៊ី ខណៈកាលពីខែមិថុនា យោធារុស្ស៊ីបានប្រទះឃើញយន្តហោះស៊ើបការណ៍បរទេសចំនួន១៥គ្រឿង ហោះក្រឡឹងក្បែរដែនអាកាសរបស់ខ្លួន ប៉ុន្តែសុទ្ធតែមិនមានការបំពានឆ្លងចូលមកឡើយ៕
