(អាហ្រ្វិក)៖ នៅឯអាកាសយានដ្ឋាន មើតាឡា មូហាំម៉េដ (Murtala Muhammed) ក្នុងទីក្រុង ឡាហ្គោស (Lagos) ប្រទេសនីហ្សេរីយ៉ា បុរសម្នាក់ស្រាប់តែបានវាឡើង លើស្លាបយន្តហោះដឹកអ្នកដំណើរមួយគ្រឿងរបស់ ក្រុមហ៊ុនអាកាសចរណ៍ អាសមែនអ៊ែរ (Azman Air) ខណៈដែលយន្តហោះនោះកំពុងត្រៀម លក្ខណៈដើម្បីហោះចាកចេញពីអាកាសយានដ្ឋាន។ នេះបើតាមការដកស្រង់ការផ្សាយចេញពី​សារព័ត៌មានរុស្ស៊ី Sputnik នៅរសៀលថ្ងៃសៅរ៍ ទី២០ ខែកក្កដា ឆ្នាំ២០១៩។

នៅពេលពីឡុតប្រទះឃើញបុរសនោះ ក៏បានសម្រេចពន្លត់ម៉ាស៊ីនយន្តហោះជាបន្ទាន់ ដើម្បីទប់ស្កាត់ហានីភ័យ ខណៈជនមិនស្គាល់អត្តសញ្ញាណ បានវាឡើងលើស្លាបខាងឆ្វេងរបស់យន្តហោះ Boeing 737។ ក្រោយមកបុរសនោះ ត្រូវបានសន្តិសុខប្រចាំព្រលានយន្តហោះឃាត់ខ្លួន។ ហេតុការណ៍នេះកើតឡើងចំពេលយន្តហោះ កំពុងរង់ចាំការអនុញ្ញាតឲ្យហោះឡើង។

គួរជម្រាបថា បើផ្អែកលើការសួរនាំ បុរសម្នាក់នោះមានបំណងចង់ធ្វើដំណើរទៅប្រទេស ហ្គាណា (Ghana តាមយន្តហោះ ប៉ុន្តែមិនព្រមបកស្រាយប្រាប់អាជ្ញាធរថា តើខ្លួនអាចលួចចូលមកដល់ផ្លូវយន្តហោះឡើង-ចុះបែបនេះ បានដោយរបៀបណាឡើយ៕