(វ៉ាស៊ីនតោន)៖ ក្រុមហ៊ុនបច្ចេកវិទ្យាអាមេរិក ដែលទទួលរងឥទ្ធិពលពីបម្រាមរបស់រដ្ឋបាលលោក ដូណាល់ ត្រាំ លើក្រុមហ៊ុនចិន Huawei កំពុងព្យាយាមរកមធ្យោបាយ ដើម្បីឲ្យរួចខ្លួនឧបសគ្គនេះ និងអាចបន្តទំនាក់ទំនងអាជីវកម្មបានខ្លះជាមួយ Huawei ហើយស្របពេលជាមួយគ្នា គឺនៅតែត្រូវរក្សាការគោរពតាមច្បាប់របស់សហរដ្ឋអាមេរិក ពាក់ព័ន្ធនឹងការកត់ឈ្មោះ Huawei ចូលក្នុងបញ្ជីខ្មៅឲ្យបានព្រមពេលជាមួយគ្នា។ នេះបើតាមការដកស្រង់ការផ្សាយចេញពីសារព័ត៌មានអាមេរិក The Wall Street Journal (WSJ) នៅល្ងាចថ្ងៃពុធ ទី២៦ ខែមិថុនា ឆ្នាំ២០១៩។

នៅពេលដែលក្រុមហ៊ុន Huawei ត្រូវបានក្រសួងពាណិជ្ជកម្មអាមេរិកកត់ឈ្មោះចូលបញ្ជីខ្មៅ កាលពីខែមុន ដែលបានហាមក្រុមហ៊ុនទាំងឡាយដែលកំពុងផ្គត់ផ្គង់ Huawei នូវគ្រឿងបន្លាស់ផលិតឡើងដោយវត្ថុធាតុដើមយកពីអាមេរិក បន្តការរកស៊ីជាមួយ Huawei ដោយពុំមានអាជ្ញាប័ណ្ណនោះ ការដឹកជញ្ជូនគ្រឿងបន្លាស់ដើម្បីផ្គត់ផ្គង់ឲ្យ Huawei ត្រូវបានផ្អាកមួយរយៈ ខណៈដែលក្រុមហ៊ុនអាមេរិកបានយកពេល ទៅវាយតម្លៃលើបម្រាមនេះ។

យ៉ាងណាមិញ បើតាមសេចក្តីរាយការណ៍របស់ The Wall Street Journal ក្រុមហ៊ុនផលិតបន្ទះឈីបដ៏ធំមួយឈ្មោះថា Micron Technology Inc. បានប្រកាសថា ខ្លួនបានបន្តការផ្គត់ផ្គង់មួយចំនួនឡើងវិញជាមួយ Huawei បន្ទាប់ពីការសម្រេចថា ការផ្គត់ផ្គង់ ទាំងប៉ុន្មាននោះមិនល្មើសនឹងច្បាប់អាមេរិក។ រីឯក្រុមហ៊ុនផលិតបន្ទះឈីប Qualcomm វិញ ក៏បានបន្តការផ្គត់ផ្គង់គ្រឿងបន្លាស់ខ្លះៗទៅកាន់ Huawei ផងដែរ ក្រោយរកឃើញថា គ្រឿងបន្លាស់ទាំងនោះ ត្រូវបានអនុញ្ញាតឲ្យធ្វើអាជីវកម្ម នៅក្រោមច្បាប់របស់ ក្រសួងពាណិជ្ជកម្មអាមេរិក។ ចំណែកក្រុមហ៊ុនបន្ទះឈីប Intel ក៏ដូចគ្នា ខណៈក្រុមហ៊ុនបច្ចេកវិទ្យាដទៃទៀត សុទ្ធតែកំពុងរិះរកមធ្យោបាយ ។

យោងតាមសេចក្តីរាយការណ៍របស់សារព័ត៌មាន The Wall Street Journal ក្រុមហ៊ុនអាមេរិកកាន់តែច្រើនឡើង កំពុងព្យាយាមដើរលើខ្សែដ៏តូចឆ្មាមួយ គឺរវាងការបំពេញតាមកិច្ចសន្យារបស់ពួកគេ ហើយបន្តការរកស៊ីជាមួយ Huawei ដើម្បីកុំឲ្យទទួលរងការខាតបង់ ប៉ុន្តែទន្ទឹមគ្នានេះគឺមិនឲ្យល្មើសនឹងការដាក់កំហិត​របស់រដ្ឋាភិបាលអាមេរិក ស្តីពីការនាំចេញបច្ចេកវិទ្យាឲ្យទៅ Huawei ឡើយ។

គួរជម្រាបថា ខណៈការកត់ឈ្មោះ Huawei ចូលក្នុងបញ្ជីខ្មៅមានន័យថា រាល់ការនាំចេញឧបករណ៍ និងបច្ចេកវិទ្យាគ្រប់ប្រភេទពីអាមេរិកទៅកាន់ចិន គឺត្រូវបានហាមឃាត់ វាមិនបានហាមឃាត់លើការផ្គត់ផ្គង់គ្រឿងបន្លាស់ ដែលផលិតឡើងនៅបរទេសនោះទេ ប្រសិនបើគ្រឿងបន្លាស់ទាំងនោះមិនមានផ្ទុកវត្ថុធាតុ ដែលមានប្រភពដើមពីអាមេរិកលើសពី ២៥ភាគរយ ដោយវត្ថុធាតុទាំងនោះអាចរួមមានគ្រឿងគ្រូវរូបវ័ន្ត Software និងការណែនាំផ្នែកបច្ចេកទេសជាដើម។

ក្រុមហ៊ុន Huawei ត្រូវបានកត់ឈ្មោះចូលក្នុងបញ្ជីខ្មៅហៅថា Entity List របស់រដ្ឋាភិបាលអាមេរិក កាលពីខែឧសភាកន្លងទៅ ខណៈប្រធានាធិបតីអាមេរិកលោក ដូណាល់ ត្រាំ ក៏បានចុះហត្ថលេខាលើបទបញ្ជាប្រតិបត្តិមួយ ដែលនឹងដាក់បម្រាមលើក្រុមហ៊ុនបច្ចេកវិទ្យានេះ ដោយឈរលើហេតុផលសន្តិសុខជាតិផងដែរ។ យ៉ាងក៏ដោយជំនួបរវាងលោក ស៊ី ជិនពីង និងលោក ដូណាល់ ត្រាំ នៅក្នុងកិច្ចប្រជុំកំពូល G-20 នៅជប៉ុនក្នុងសប្តាហ៍នេះអាចមានបញ្ហា Huawei ស្ថិតនៅក្នុងតុចរចា៕