(ប៉េកាំង)៖ គ្រោះធម្មជាតិរញ្ជួយផែនដីដ៏កក្រើកដែលមានកម្រិតរហូតដល់ទៅ ៧.៦រ៉ិចទ័រ បានវាយប្រហារដែនសមុទ្រ បាន់ដា (Banda Sea) នៃប្រទេសឥណ្ឌូណេស៊ី នៅវេលាម៉ោង ១០៖៥៣នាទីព្រឹកថ្ងៃចន្ទនេះតែម្តង (ម៉ោងនៅទីក្រុងប៉េកាំង) ខណៈដែលប៉ុន្មានម៉ោងមុខនេះ គ្រោះរញ្ជួយដីមួយទៀតកម្រិតបង្គួរ ៦​.១រ៉ិចទ័រ ក៏ទើបតែបានវាយប្រហារខេត្តប៉ាពួ ភាគខាងកើតប្រទេសអាស៊ីអាគ្នេយ៍នេះផងដែរ។ នេះបើតាមការចេញផ្សាយនៅមុននេះបន្តិច​ដោយស៊ីនហួរ ដកស្រង់ទិន្នន័យពីមជ្ឈមណ្ឌលតាមដានគ្រោះរញ្ជួយដីចិន CENC នាព្រឹកថ្ងៃចន្ទ ទី២៤ ខែមិថុនា ឆ្នាំ២០១៩។

មិនទាន់មានសេចក្តីរាយការណ៍អំពីការរងគ្រោះ ឬក៏អាចកើតមានរលកយក្ស​ស៊ូណាមិនោះឡើយ ប៉ុន្តែរំញ័ររហូតដល់កម្រិត ៧.៦រ៉ិចទ័របែបនេះគឺពិតជាធ្ងន់ធ្ងរ និងកម្រកើតមានឡើងណាស់​នៅទូទាំងពិភពលោក។ គួរបញ្ជាក់ថា ដែនសមុទ្របាន់ដាស្ថិតនៅភាគកណ្តាល​ប្រទេសឥណ្ឌូណេស៊ី ដោយមានបណ្តោះកោះធំៗរួមទាំងរដ្ឋធានីហ្សាការតាផងដែរ នៅព័ទ្ធជុំវិញ៕