(វ៉ាស៊ីនតោន)៖ Institute of Electrical and Electronics Engineers (IEEE) ដែលជាវិទ្យាស្ថានបោះពុម្ភផ្សាយផ្នែកវិទ្យសាស្ត្រ ដ៏ធំមួយនៅលើពិភពលោក បានសម្រេចចិត្តដកហូតការរឹតត្បិតលើក្រុមហ៊ុនចិន Huawei ដោយអនុញ្ញាតឱ្យបុគ្គលិករបស់ក្រុមហ៊ុនចិនមួយនេះ ត្រួតពិនិត្យ និងកែសម្រួល ឯកសារមួយចំនួន​ដែលផ្ញើទស្សនាវដ្ដី IEEE។ នេះបើតាមការចេញផ្សាយដោយ​សារព័ត៌មាន CGTN ដែលត្រូវបានដកស្រង់នៅថ្ងៃព្រហស្បតិ៍ ទី០៦ ខែមិថុនា ឆ្នាំ២០១៩។

វិទ្យាសា្ថន IEEE មានមូលដ្ឋានៅសហរដ្ឋអាមេរិក បានបញ្ជាក់នៅក្នុងសេចក្ដីថ្លែងការណ៍របស់ខ្លួន ដូច្នេះថា «IEEE ទទួលបានសំណើមួយពីក្រសួងពាណិជ្ជកម្មអាមេរិក ស្ដីពីការរឹតត្បិតសកម្មភាព ផ្សព្វផ្សាយរបស់ IEEE។ ពោលផ្អែកលើសំណើនេះ បុគ្គលិកក្រុមហ៊ុន Huawei និងសាខារបស់ខ្លួន អាចចូលរួមក្នុងនាមជាអ្នកត្រួតពិនិត្យ និងជាអ្នកកែសម្រួល នៅលើនីតិវីធីផ្សព្វផ្សាយរបស់យើង»។

គួរជម្រាបថា ការសម្រេចចិត្តខាងលើរបស់ IEEE កើតមានឡើងបន្ទាប់ពីវិទ្យាស្ថានចិនជាច្រើន បានចេញសេចក្ដីថ្លែងការណ៍រួម ដោយរិះគន់យ៉ាងខ្លាំងលើការរឹតត្បិតរបស់វិទ្យាស្ថានអាមេរិក មួយនេះចំពោះក្រុមហ៊ុន Huawei កាលពីថ្ងៃទី០២ ខែមិថុនា តាមសំណើរបស់ក្រសួងការពាណិជ្ជកម្មអាមេរិក៕