(ប៉េកាំង)៖ ប្រធានាធិបតីចិន លោក ស៊ី ជិនពីង នាថ្ងៃពុធនេះ បានធ្វើដំណើរទៅដល់ទីក្រុងម៉ូស្គូហើយ ដើម្បីបំពេញទស្សនកិច្ច​​រយៈពេល០៣ថ្ងៃ ចាប់ពីថ្ងៃពុធនេះ រហូតដល់ថ្ងៃសុក្រ។ នេះបើតាមការដកស្រង់ការផ្សាយចេញពីសារព័ត៌មានចិន CGTN នៅរសៀលថ្ងៃពុធ ទី០៥ ខែមិថុនា ឆ្នា២០១៩។

ដំណើរទស្សនកិច្ចនេះធ្វើឡើងតបតាមការអញ្ជើញដោយផ្ទាល់ ពីសំណាក់​ប្រធានាធិបតីរុស្ស៊ី លោក វ៉្លាឌីមៀ ពូទីន។ មុនពេល​ចេញដំណើរទៅម៉ូស្គូ លោក ស៊ី បានបង្ហាញពីឆន្ទៈរបស់ប្រទេសចិន ក្នុងការត្រៀមខ្លួនដើម្បីចាប់ដៃជាមួយរុស្ស៊ី ក្នុងការសម្រេច​​ឲ្យបាននូវដំណើរការដ៏អស្ចារ្យជាងមុន ទៅលើកិច្ចសហប្រតិបត្តិការរវាងបណ្តាប្រទេសជាសមាជិក BRICS ព្រមទាំងអង្គការកិច្ច​សហប្រតិបត្តិការសៀងហៃ (SCO)។

គួរជម្រាបថា នាឱកាសបំពេញទស្សនកិច្ចនៅរុស្ស៊ី លោក ស៊ី ក៏នឹងធ្វើការចូលរួមផងដែរ ក្នុងវេទិកាសេដ្ឋកិច្ចអន្តរជាតិទីក្រុង St. Peterburg លើកទី២៣៕