(ស៊ីដនី)៖ មនុស្សយ៉ាងហោចណាស់ចំនួន០៤នាក់ បានបាត់បង់ជីវិត បន្ទាប់ពីខ្មាន់កាំភ្លើងម្នាក់ បានធ្វើសកម្មភាពបាញ់ប្រហារ នៅក្នុងទីក្រុង Darwin នៃប្រទេសអូស្រ្តាលី។ នេះបើតាមការដកស្រង់ការផ្សាយចេញពីសារព័ត៌មាន Channel News Asia នៅ​យប់ថ្ងៃអង្គារ ទី០៤ ខែមិថុនា ឆ្នាំ២០១៩។

បើតាមប្រព័ន្ធផ្សព្វផ្សាយក្នុងស្រុករបស់អូស្រ្តាលី ស្នូរកាំភ្លើងជាច្រើនគ្រាប់បានលឺឡើង នៅក្បែរផ្ទះសំណាក់មួយកន្លែង នា​វេលាម៉ោងជិត០៦៖០០នាទីយប់ថ្ងៃអង្គារនេះ (ម៉ោងនៅអូស្រ្តាលី) ភាគខាងជើងប្រទេសអូស្រ្តាលី។ ទាក់ទិនសកម្មភាពបាញ់​ប្រហារ បុរសជាខ្មាន់កាំភ្លើងម្នាក់ ដែលជាបានប្រើប្រាស់កាំភ្លើងស្នប់ ហើយបើតាមការអះអាងពីសាក្សី ខ្មាន់កាំភ្លើងនោះ បានដើរស្វែង​រកមនុស្សដើម្បីបាញ់ពីបន្ទប់មួយទៅមួយ មុនពេលគេចខ្លួនពីកន្លែងកើតហេតុ តាមរយៈរថយន្តមួយគ្រឿង រហូតក្រោយមក​ទើបត្រូវអាជ្ញាធរអូស្រ្តាលីតាមចាប់បាន។

គួរជម្រាបថា ក្រៅពីមនុស្សស្លាប់ ក៏មានសេចក្តីរាយការណ៍ថា មានមនុស្សមួយចំនួនរងរបួសផងដែរ ខណៈ​ចេតនានៅពីក្រោយ​ករណីបាញ់សម្លាប់មនុស្សនេះ កំពុងស្ថិតក្រោមការស៊ើបអង្កេត៕