(តូក្យូ)៖ នាយករដ្ឋមន្ត្រីម៉ាឡេស៊ីលោក មហាធៀ មហំាម៉ាត់ បាននិយាយថា ពិភពលោកបច្ចុប្បន្នកំពុងស្ថិតនៅក្នុងស្ថានភាពឥតសណ្ដាប់ធ្នាប់ ដែលចាំបាច់ត្រូវការប្រព័ន្ធថ្មីមួយផ្អែកលើមូលដ្ឋានច្បាប់ ដែលអនុញ្ញាតឱ្យបណ្ដាប្រទេសនានា​ដោះស្រាយជម្លោះតាមរយៈកិច្ចចរចា និងមានអាជ្ញាកណ្ដាល។ នេះបើតាម ការចេញផ្សាយដោយសារព័ត៌មាន Channel News Asia នៅល្ងាចថ្ងៃព្រហស្បតិ៍ ទី៣០ ខែឧសភា ឆ្នាំ២០១៩។

លោក មហាធៀ ធ្វើការកត់សម្គាល់បែបនេះ នៅក្នុងសន្និសីទសារព័ត៌មានមួយ​នៅថ្ងៃព្រហស្បតិ៍នេះ នាឱកាសចូលរួមវេទិការអន្តរជាតិលើកទី ២៥ ស្ដីពីអនាគតតំបន់អាស៊ី ដែលកំពុងប្រព្រឹត្តទៅនៅក្នុងប្រទេសជប៉ុន។ នាយករដ្ឋមន្ត្រីវ័យ ៩៣ឆ្នាំរូបនេះ បានលើកឡើងដូច្នេះថា «សណ្ដាប់ធ្នាប់ពិភពលោកបច្ចុប្បន ហាក់ដូចជាបរាជ័យ... ហើយបរាជ័យនេះគឺដោយសារតែយើងចូលចិត្តដើរតាមជំហានហិង្សា និងគំរាមកំហែង គ្នាទៅវិញទៅមក នៅពេលដែលមិនអាចដោះស្រាយការខ្វែងគំនិតគ្នាបាន»។

គួរបញ្ជាក់ថា បើតាមលោក មហាធៀ ពិភពលោកបច្ចុប្បន្ន ត្រូវជាចំាបាច់នូវប្រព័ន្ធថ្មីមួយផ្អែកលើមូល ដ្ឋានច្បាប់ដែលអនុញ្ញាតឱ្យបណ្ដាប្រទេសនានា ដោះស្រាយជម្លោះតាមរយៈកិច្ចចរចា និងអាជ្ញាកណ្ដាលដោយស្មើភាព។ ប៉ុន្តែដើម្បីបានប្រព័ន្ធថ្មីនេះ លោកក៏បានបញ្ជាក់ដែរថា ពិភពលោកត្រូវតែសម្រេចចិត្តទាំងអស់គ្នាថា រាល់ជម្លោះទាំងអស់ត្រូវតែផ្សះផ្សានៅលើតុចរចា៕