(វ៉ាស៊ីនតោន)៖ អាជ្ញាធរអាកាសចរណ៍អាមេរិក FAA បានចេញសេចក្តីប្រកាសប្រាប់ដល់ បណ្តាអាកាសចរណ៍អន្តរជាតិ ឲ្យបង្កើនការប្រុងប្រយ័ត្នខ្ពស់នៅពេលធ្វើដំណើរ​ចូលដែនអាកាសពីលើឈូងសមុទ្រពែក និងឈូងសមុទ្រអូម៉ង់ ព្រោះយន្តហោះទាំងនោះអាចប្រឈមនឹងការយល់ច្រឡំ នៅចំពោះមុខភាពតានតឹងរវាងទីក្រុងវ៉ាស៊ីនតោន និងទីក្រុងតេហេរ៉ង់ ដែលបានផ្ទុះឡើងខ្លាំងថ្មីៗនេះ។ នេះបើតាមការដកស្រង់ការផ្សាយ​ចេញពីសារព័ត៌មាន Sputnik នៅរសៀលថ្ងៃសៅរ៍ ទី១៨ ខែឧសភា ឆ្នាំ២០១៩។

យោងតាមសេចក្តីថ្លែងការណ៍របស់អាជ្ញាធរអាមេរិក FAA បានលើកឡើងយ៉ាងដូច្នេះថា «រាល់អាកាសយានិកនៃយន្តហោះស៊ីវិលទាំងអស់ ដែលធ្វើប្រតិបត្តិការនៅម្តុំតំបន់ឈូងសមុទ្រពែក និងអូម៉ង់ គួរបង្កើនការប្រុងប្រយ័ត្នខ្ពស់ ចំពោះការកើនឡើងសកម្មភាពយោធា និងភាពតានតឹងផ្នែកនយោបាយនៅក្នុងតំបន់ ព្រោះថាពួកគេអាចប្រឈមនឹង​ការកំណត់អត្តសញ្ញាណច្រឡំ»។

គួរជម្រាបថា ភាពតានតឹងរវាងទីក្រុងវ៉ាស៊ីនតោន និងទីក្រុងតេហេរ៉ង់ បានផ្ទុះឡើងខ្លាំងនាពេលថ្មីៗនេះ ស្របពេលដែលអាមេរិក បានសម្រេចបញ្ជូននាវាដឹកយន្តហោះចម្បាំង អាប្រាហាំ លីងខូលន៍ (Abraham Lincoln) និងក្បួនយន្តហោះទម្លាក់គ្រាប់បែកទៅកាន់តំបន់មជ្ឈិមបូព៌ា ដើម្បីជាសារព្រមានដល់អ៊ីរ៉ង់ ហើយលើសពីនេះទៀត ទីក្រុងវ៉ាស៊ីនតោនក៏បានអនុញ្ញាតឲ្យបញ្ជូនបន្ថែមនូវប្រព័ន្ធមីស៊ីល ផាទ្រីយ៉ូត (Patriot) និងនាវាយោធា អេលីងតុន (Arlington) ផងដែរ ខណៈនាវាពិឃាតពីរគ្រឿង​ដែលមានបំពាក់មីស៊ីលប្រដេញ ទើបតែបានចល័តដល់ឈូងសមុទ្រពែក៕