(ការ៉ាកាស់)៖ អតីតអ្នករាយការណ៍ពិសេសអង្គការសហប្រជាជាតិ (UN) ប្រចាំវេណេស៊ុយអេឡាលោក អាលហ្វ្រេដ ដេ ហ្សាយ៉ាស (Alfred de Zayas) បាននិយាយថា សហរដ្ឋអាមេរិកនឹងមិនបញ្ឈប់ការគាំទ្រការធ្វើរដ្ឋប្រហារ និងការដាក់សម្ពាធលើវេណេស៊ុយអេឡាឡើយ រហូតទាល់តែលោក នីកូឡាស់ ម៉ាឌូរ៉ូ ទទួលមរណភាព។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃអង្គារ ទី០៧ ខែឧសភា ឆ្នាំ២០១៩។

លោក Alfred de Zayas ធ្វើការសន្និដ្ឋានខាងលើនៅក្នុងបទសម្ភាសន៍ជាមួយ Sputnik។ នាឱកាសនោះ លោក Zayas បានលើកឡើងយ៉ាងដូច្នេះថា «ផ្អែកលើប្រភពគួរឱ្យទុកចិត្តជាច្រើន ក្នុងរយៈពេលជាច្រើនខែមកនេះ សហរដ្ឋអាមេរិកបានព្យាយាម បញ្ចុះបញ្ចូលយោធាវេណេស៊ុយអេឡាឱ្យរត់ចោលជួរ និងផ្ដល់លុយកាក់គាំទ្រដល់ផែនការធ្វើរដ្ឋប្រហារ ក្នុងនោះរួមមានទាំងការប៉ុនប៉ងសម្លាប់​លោក នីកូឡាស់ ម៉ាឌូរ៉ូ ផងដែរ។ ប៉ុន្តែសហរដ្ឋអាមេរិកនឹងបន្តដើរតាមជំហានទាំងនេះទៀត រហូតទាល់តែពួកគេទទួលជោគជ័យ ក្នុងការសម្លាប់លោក ម៉ាឌូរ៉ូ»។

គួរជម្រាបថា បើតាមលោក Zayas នៅក្នុងករណីសហរដ្ឋអាមេរិកអាចកម្ចាត់លោក ម៉ាឌូរ៉ូ បានក៏ដោយ តែទីក្រុងវ៉ាស៊ីនតោននឹងមិនអាចសម្រេចបំណង ក្នុងការប្ដូរមេដឹកនាំ ដែលពួកគេចង់បាននោះឡើយដ្បិតមាត្រា ២៣៣ នៃរដ្ឋធម្មនុញ្ញវេណេស៊ុយអេឡាបច្ចុប្បន្ន​បានចែងថា បើគ្មានលោក ម៉ាឌូរ៉ូ នោះអនុប្រធានាធិបតី លោកស្រី ឌែលស៊ី រ៉ូទ្រីហ្គែស (Delcy Rodriguez) នឹងក្លាយជាប្រធានាធិបតីស្ដីទីស្របច្បាប់ ពោលគឺមិនមែនមេបក្សប្រឆាំង លោក ហ្ស៊ន ហ្គៃដូ (Juan Gauido) នោះឡើយ។

ទោះបីជាបែបនេះក្តី អតីតមន្ត្រី UN ខាងលើនេះថែមទាំងហ៊ានសន្និដ្ឋានដល់​ចំណុចរសើបបំផុតមួយទៀត នោះគឺសហរដ្ឋអាមេរិកអាចប្រើប្រាស់សន្លឹកបៀរចុងក្រោយ ដោយបញ្ជាឱ្យទីភ្នាក់ងារ CIA របស់ខ្លួន ធ្វើឃាតលោក Gauido ហើយប្រើលេសនេះដើម្បីធ្វើអន្តរាគមន៍យោធា ចូលមកប្រទេសវេណេស៊ុយអេឡាតែម្តង៕