(វៀងចន្ទ)៖ ក្រសួងកសិកម្ម និងរុក្ខាប្រមាញ់ឡាវមានគម្រោងផលិតស្រូវ​ឱ្យបានយ៉ាងហោចណាស់ ៥លានតោនក្នុងមួយឆ្នាំៗ ក្រោមផែនការយុទ្ធសាស្ត្រអភិវឌ្ឍន៍​វស័យកសិកម្មរយៈពេល ០៥ឆ្នាំគិតត្រឹមឆ្នាំ២០២៥។ នេះបើតាមប្រព័ន្ធផ្សព្វផ្សាយ​ក្នុងស្រុក ចុះផ្សាយបន្តដោយទីភ្នាក់ងារព័ត៌មានចិនស៊ីនហួរ នៅរសៀលថ្ងៃចន្ទ ទី២៩ ខែមេសា ឆ្នាំ២០១៩។

សារព័ត៌មាន Vientiane Times ដោយផ្អែកលើរបាយការណ៍យុទ្ធសាស្ត្រ ០៥ឆ្នាំរបស់ក្រសួងកសិកម្ម និងរក្ខប្រមាញ់ឡាវ បានបញ្ជាក់ទៀតថា ផលិតផលនៅក្នុងស្រុកសរុបនៃវិស័យកសិកម្ម និងរុក្ខាម្រាញ់ នឹងកើនឡើងក្នុងអត្រា ៣.៤ភាគរយ ដែលមានន័យថា វិស័យនេះបានចូលរួមចំណែក ១៩ភាគរយក្នុងកំណើនសេដ្ឋកិច្ចជាតិ។

មិនតែប៉ុណ្ណោះគិតត្រឹមឆ្នាំ២០២៥ ដោយការអនុវត្តផែនការកសិកម្មប្រកបដោយគុណភាព និងកិច្ចសហប្រតិបត្តិការជាមួយដៃគូឧស្សាហកម្មដទៃ ប្រជាជនឡាវនឹងទទួល បានសារធាតុចិញ្ចឹម ២,៦០០គីឡូកាឡូរីជាមធ្យមក្នុងមួយថ្ងៃ ពីចំណីអាហារក្នុងស្រុក​ដែលមានការកើនឡើង។

គួរបញ្ជាក់ថា បើតាមក្រសួងកសិកម្ម និងរក្ខប្រមាញ់ឡាវ ផលិតផលសាច់ និងស៊ុត បានកើនឡើងដល់ ៤១៤,០០០តោន ខណៈត្រី និងជលផលផ្សេងទៀត ២៩៧,០០០តោនក្នុងមួយឆ្នាំ។ ចំណែកឯការនាំចេញផលិតផលធ្វើពីសាច់​ត្រូវបានគេរំពឹងថា នឹងកើនដល់ ១៥,០០០តោន៕