(តូក្យូ)៖ ខណៈព្រះចៅអធិរាជជប៉ុន អាគីហីតុ (Akihito) នឹងដាក់រាជ្យនាថ្ងៃអង្គារសប្តាហ៍ក្រោយ ហើយព្រះរាជទាយាទរបស់ទ្រង់ គឺព្រះអង្គម្ចាស់ ណារូហីតុ (Naruhito) ត្រូវឡើងស្នងរាជ្យបន្តពីព្រះបិតា ព្រះរាជពិធីសំខាន់ៗមួយចំនួននឹងត្រូវរៀបចំឡើង។

ការដាក់រាជសម្បត្តិលើកចុងក្រោយបំផុតដោយព្រះចៅអធិរាជជប៉ុន បានកើតមានតាំងតែពីឆ្នាំ១៨១៧។ ព្រះអង្គម្ចាស់ Naruhito នឹងក្លាយជាព្រះចៅអធិរាជថ្មី នៅថ្ងៃពុធសប្តាហ៍ក្រោយនេះ ក៏ប៉ុន្តែការឡើងគ្រងរាជសម្បត្តិជាផ្លូវការរបស់ទ្រង់ នឹងប្រព្រឹត្តទៅ ក្នុងព្រះរាជពិធីមួយផ្សេងទៀតនៅខែតុលាឯណោះ ក្រោមការចូលរួមពីសំណាក់ឥស្សរជនជាន់ខ្ពស់បរទេស។

ខាងក្រោមគឺជាកាលបរិច្ឆេទនៃព្រះរាជពិធីសំខាន់ៗមួយចំនួន៖

*ថ្ងៃទី៣០ ខែមេសា៖ ព្រះរាជពិធីដាក់រាជ្យរបស់ព្រះចៅអធិរាជ Akihito នឹងត្រូវរៀបចំឡើងក្នុងសាល Matsu no ma ឬ Hall of Pine នៃព្រះរាជវាំងជប៉ុន នាវេលាម៉ោង០៥៖០០នាទី ដល់ម៉ោង០៥៖១០នាទីល្ងាច (ម៉ោងនៅជប៉ុន) ក្រោមវត្តមានបុគ្គល៣០០នាក់ ហើយពិធីនេះនឹងត្រូវផ្សាយផ្ទាល់តាមកញ្ចប់ទូរទស្សន៍ជាតិជប៉ុន។ ក្នុងអំឡុងព្រះរាជពិធី រតនសម្បត្តិទាំង០៣របស់អធិរាជជប៉ុន គឺកញ្ចក់ពិសិដ្ឋ Yata no Kagami ដាវពិសិដ្ឋ Kusanagi no Tsurugi និងបន្តោងគុជ Yasakani no Magatama ដែលបានតម្កល់ទុក នៅកន្លែងខុសៗគ្នាក្នុងប្រទេសជប៉ុន នឹងត្រូវយកចូលទៅក្នុងសាល Matsu no ma។ វត្ថុទាំង០៣ គឺជានិមិត្តរូបនៃរាជបល្ល័ង្កជប៉ុន។ បន្ទាប់មកនាយករដ្ឋមន្រ្តីជប៉ុន លោក ស៊ីនហ្សូ អាបេ នឹងប្រកាសពីការដាក់រាជសម្បត្តិ ក្រោយព្រះចៅ Akihito មានបន្ទូលជាលើក​ចុងក្រោយទៅកាន់ប្រជាជាតិ ក្នុងនាមជាអធិរាជនៃប្រទេសជប៉ុន។

*ថ្ងៃទី០១ ខែឧសភា៖ ព្រះរាជពិធីស្នងរាជសម្បត្តិ ដែលជាដំណាក់កាលដំបូងនៃការឡើងស្នងរាជ្យរបស់ព្រះអង្គម្ចាស់ Naruhito បន្តពីព្រះបិតា នឹងប្រព្រឹត្តទៅនាវេលាម៉ោង១០៖៣០នាទីដល់ម៉ោង១០៖៤០នាទីព្រឹក។ រតនសម្បត្តិទាំង០៣ នឹងត្រូវដាក់នៅពីមុខព្រះចៅអធិរាជថ្មី ដើម្បីធ្វើជាតឹកតាងនៃការឡើងស្នងរាជសម្បត្តិ ដោយពេញសិទ្ធិរបស់ទ្រង់។ ព្រះរាជពិធីនេះនឹងមិនធំដុំប៉ុន្មានឡើយ ដោយនឹងមានការចូលរួមពីបណ្តាសែរាជវង្សជប៉ុនដែលជា​បុរសៗ ព្រមទាំងតំណាងមកពីស្ថាប័នទាំង០៣របស់រដ្ឋាភិបាល ខណៈព្រះចៅ Akihito ដែលពេលនោះនឹងក្លាយជាអតីតអធិរាជ​ ក៏ដូចជាមហេសីរបស់ទ្រង់ មីឈីកុ (Michiko) នឹងពុំមានព្រះរាជវត្តមានឡើយ។

ព្រះរាជពិធីនេះ មិនអនុញ្ញាតឲ្យសែរាជវង្សជានារីភេទចូលរួមនោះទេ ប៉ុន្តែលោកស្រី Satsuki Katayama ដែលជាស្រ្តីតែម្នាក់គត់ក្នុងជួរគណៈរដ្ឋមន្រ្តីរបស់លោក អាបេ នឹងក្លាយជាស្រ្តីដំបូងគេក្នុងប្រវត្តិសាស្រ្តសម័យទំនើបរបស់ជប៉ុន ដែលនឹងបានចូលរួម។ ក្នុងព្រះរាជពិធីនោះ ព្រះរាជទាយាទ Naruhito នឹងគ្រងសម្លៀកបំពាក់បែបលោកខាងលិច ខណៈព្រះបិតាទ្រង់ ក៏បានគ្រងឈុតសម្លៀកបំពាក់បែបនេះដែរ នៅពេលព្រះអង្គបានក្លាយជាព្រះចៅអធិរាជជប៉ុន កាលពីខែមករា ឆ្នាំ១៩៨៩។

ប្រមាណជាកន្លះម៉ោងក្រោយព្រះរាជពិធីខាងលើ ព្រះចៅអធិរាជថ្មីនឹងមានព្រះបន្ទូលជាលើកដំបូងទៅកាន់ប្រជាជាតិចេញពីសាល Matsu no Ma ខណៈលោក អេបេ នឹងថ្លែងក្នុងនាមជាអ្នកតំណាងឲ្យប្រជាជាជន។ ក្នុងឱកាសនោះ មហេសីរបស់ព្រះចៅ Naruhito នឹងសមាជិកសែរាជវង្សឯទៀតៗក៏នឹងមានវត្តមានផងដែរ។

*ថ្ងៃទី០៤ ខែឧសភា៖ ព្រះចៅអធិរាជ Naruhito នឹងមហេសី ម៉ាសាកុ (Masako) នឹងទទួលស្វាគមន៍អ្នកជូនពរជូនជ័យ នៅព្រះរាជវាំង។ កាលពីឆ្នាំ១៩៩០ មនុស្សម្នាជាង១០០,០០០ម្នាក់បាននាំគ្នាទៅជូនពរជ័យដល់ព្រះចៅអធិរាជ Akihito និងមហេសី Michiko។

*ថ្ងៃទី២២ ខែតុលា៖ ព្រះរាជពិធីដ៏ធំមួយនឹងត្រូវធ្វើឡើង សម្រាប់ការឡើងគ្រងរាជសម្បត្តិជាផ្លូវការ របស់ព្រះចៅអធិរាជ Naruhito នៅចំពោះមុខឥស្សរជនមកពីបណ្តាប្រទេសជិត២០០ជុំវិញពិភពលោក។ ដោយក្នុងនោះព្រះរាជពិធីនេះ ព្រះចៅអធិរាជ Naruhito នឹងត្រូវគ្រងឈុតសម្លៀកបំពាក់បែបប្រពៃណីជប៉ុន និងគង់នៅលើឆាកមួយដែលគេហៅថា Takamikura។ ក្រោយមកព្រះចៅអធិរាជថ្មីនៃប្រទេសជប៉ុន នឹងប្រកាសពីការឡើងគ្រងរាជសម្បត្តិរបស់ទ្រង់ទៅកាន់ពិភពលោក។

ជាចុងក្រោយព្រះចៅអធិរាជ Naruhito ព្រមទាំងមហេសី នឹងយាងធ្វើដំណើរនៅក្នុងរថយន្តម៉ាក Toyota Century ដោយចំហដំបូង ឆ្លងកាត់កណ្តាលទីក្រុងតូក្យូ។ កាលពីឆ្នាំ១៩៩០ មនុស្សសរុបប្រមាណ១២០​,០០០នាក់ ដោយភាគច្រើនឈរគ្រវីទង់ជាតិ បានតំរៀបជួរគ្នាតាមដងផ្លូវ ដើម្បីអបអរដល់ព្រះចៅអធិរាជ Akihito និងមហេសី Michiko នៅពេលទ្រង់ទាំងពីរធ្វើដំណើរក្នុងរថយន្ត Rolls-Royce Corniche III។

គួរជម្រាបថា បើតាមរដ្ឋាភិបាលជប៉ុន ការចំណាយសម្រាប់ពិធីឡើងគ្រងរាជសម្បត្តិរបស់ព្រះចៅអធិរាជថ្មីអាចមានទំហំខ្ទង់​២.៧ពាន់លានយេន ឬ២៤លានដុល្លារ៕

ប្រភព៖ Reuters (នៅអាទិត្យ ថ្ងៃទី២៨ ខែមេសា ឆ្នាំ២០១៩)