(បាងកក)៖ ប៉ូលិសថៃ​នៅថ្ងៃព្រហស្បតិ៍នេះ បានប្រកាសពីការរឹបអូស​គ្រឿងញៀនដែលមាន​តម្លៃប្រហែល ២៥លានដុល្លារ នៅក្នុងប្រតិបត្តិការ​បង្រ្កាបគ្រឿង​ញៀនចំនួន ០៣ករណីធំៗនាពេលថ្មីៗនេះ។ នេះបើតាម​ការចេញផ្សាយដោយ​ទីភ្នាក់ងារព័ត៌មានចិន​ស៊ីនហួរ នៅល្ងាចថ្ងៃព្រហស្បតិ៍ ទី២១ ខែមីនា ឆ្នាំ២០១៩។

យោងតាមប៉ូលិសថៃ​ គ្រឿងញៀន​ចំរុះ​ដែលត្រូវបានរឹបអូស​ពីក្រុមរត់ពន្ធខុស​ច្បាប់នោះ​មានដូចជា មេតំហ្វេតាមី (methamphetamine) ចំនួន ៨លានគ្រាប់, មេតំហ្វេតាមី-គ្រីស្តាល់ (crystal methamphetamine) ទម្ងន់ ២,០៧០ក្រាម និងកូកាអ៊ីន ១,៥៤៦ក្រាម។ ​ចំណែកឯ ជនសង្ស័យ ០៤នាក់ត្រូវបានចាប់ខ្លួន និងម្នាក់ទៀត ត្រូវបានបាញ់​សម្លាប់នៅអំឡុងប្រតិបត្តិការ​បង្រ្កាបគ្រឿង​ញៀន។

គួរបញ្ជាក់ថា ខាងលើនេះ​គឺជាការបង្ក្រាប​គ្រឿងញៀនទ្រង់ទ្រាយធំ​របស់ប្រទេស​ថៃ ដែល​ភាគច្រើន​​គឺជាការព្យាយាម​រត់ពន្ធឆ្លងកាត់​ប្រទេស តាមរយៈប្រទេស​ជិតខាង ជាពិសេស​តំបន់ភាគខាង​ជើងប្រទេស​អាស៊ាន​មួយនេះ។ ការបង្ក្រាប​ទាំងបីករណីខាង​លើនេះ​ត្រូវបានធ្វើ​ឡើងនៅខេត្តឈាងរ៉ៃ​មួយករណី (Chiang Rai) និង​អាកាសយានដ្ឋាន​អន្តរជាតិ​សុវណ្ណភូមិ​​ ស្ថិតនៅជាយទីក្រុង​បាងកក​ពីរករណី៕