(ម៉ូស្គូ)៖ ចិនកំពុងចងសម្ព័ន្ធភាពកាន់តែជិតស្និទ្ធជាមួយប៉ាគីស្ថាន ដើម្បីទប់ទល់ជាមួយឥណ្ឌា ដូច្នេះហើយការដាក់ពង្រាយឡើងវិញ នូវនាវាផ្ទុកយន្ដហោះចម្បាំង នាវាចម្បាំង និងនាវាមុជទឹកនុយក្លេអ៊ែររបស់ទីក្រុងញូដេលី ទៅកាន់តំបន់សមុទ្រអារ៉ាប់នៃភាគខាងជើងមហាសមុទ្រឥណ្ឌា គឺជាសារមួយផ្ញើជូនទីក្រុងប៉េកាំងយ៉ាងច្បាស់។ នេះបើតាមអ្នកជំនាញម្នាក់ ដកស្រង់ការចេញផ្សាយដោយសារព័ត៌មាន RT នៅព្រឹកថ្ងៃអង្គារ ទី១៩ ខែមីនា ឆ្នាំ២០១៩។
អតីតបេសកជនឥណ្ឌាប្រចាំប្រទេសប៉ាគីស្ថាន លោក ហ្គោផាឡាភូរ៉ាម ផាថាសារ៉ាធី (Gopalapuram Parthasarathy) ធ្វើការកត់សម្គាល់បែបនេះ នៅក្នុងបទសម្ភាសន៍ជាមួយ Russian Today នៅក្នុងសប្ដាហ៍នេះ។ ថ្លែងនាឱកាសនោះ លោក Parthasarathy បានគូសបញ្ជាក់យ៉ាងដូច្នេះថា «ឥណ្ឌាមិនមែនព្រួយបារម្ភតែទៅលើសកម្មភាពរបស់ប៉ាគីស្ថាននោះទេ ប៉ុន្តែទីក្រុងញូដេលីក៏ខ្វាយខ្វល់ផងដែរ ចំពោះអ្វីដែលទីក្រុងប៉េកាំងកំពុងធ្វើ នោះគឺការទប់ស្កាត់ឥទ្ធិពលឥណ្ឌា នៅក្នុងតំបន់មហាសមុទ្រឥណ្ឌា»។
អ្នកជំនាញរូបនេះបន្ថែមថា ចិនកំពុងប្រើប្រាស់ប៉ាគីស្ថានជាឧបករណ៍ទប់ទល់នឹងឥណ្ឌា តាមរយៈការផ្គត់ផ្គង់អាវុធ មីស៊ីល រួមទាំងអាវុធនុយក្លេអ៊ែរជាដើម។ ដូច្នេះហើយការដាក់ពង្រាយឡើងវិញនូវនាវាផ្ទុកយន្ដហោះចម្បាំង នាវាចម្បាំង និងនាវាមុជទឹកនុយក្លេអ៊ែររបស់ទីក្រុងញូដេលី ទៅកាន់តំបន់សមុទ្រអារ៉ាប់នៃភាគខាងជើងមហាសមុទ្រឥណ្ឌា គឺជាសារមួយផ្ញើជូន ទីក្រុងប៉េកាំងយ៉ាងច្បាស់។
គួរបញ្ជាក់ថា កាលពីថ្ងៃចន្ទកន្លងទៅយោធាឥណ្ឌាត្រូវបានគេរាយការណ៍ថា បានបញ្ជូននាវាចម្បាំងឥណ្ឌាជាច្រើនគ្រឿង ក្នុងនោះរួមមានទាំងនាវាផ្ទុកយន្ដហោះចម្បាំង INS Vikramaditya និងនាវាមុជទឹកនុយក្លេអ៊ែរ ទៅកាន់តំបន់ក្បែរដែនទឹករបស់ប៉ាគីស្ថាន ដើម្បីទប់ស្កាត់សកម្មភាពបង្ករឿងណាមួយ ពីទីក្រុងអ៊ីស្លាម៉ាបាដ៕
