(ហុងកុង)៖ គ្រោះថ្នាក់​រថភ្លើងពីរខ្សែបុកគ្នា​យ៉ាងពេញទំហឹង បាននិងកំពុង​បង្ករការ​រាំងស្ទះ​យ៉ាងខ្លាំង​ ដល់​សេវាកម្មដឹក​ជញ្ជូននៅក្នុងទីក្រុង​ហុងកុង​នៅថ្ងៃចន្ទ​នេះ ខណៈអ្នកដំណើរ​រាប់ពាន់នាក់រងផល​ប៉ះពាល់។ នេះបើតាម​ការចេញផ្សាយ​ដោយ​សារព័ត៌មាន Channel News Asia នៅរសៀល​ថ្ងៃចន្ទ ទី១៨ ខែមីនា ឆ្នាំ២០១៩។

អ្នកបើកបររថភ្លើងទាំងពីរគ្រឿង ដែលប្រតិបត្តិដោយ​ក្រុមហ៊ុន MTR Corp ត្រូវបានបញ្ជូន​ទៅកាន់​មន្ទីរពេទ្យ ហើយអាជ្ញាធរ​ក៏បាន​អំពាវនាវផង​ដែរឱ្យអ្នកដំណើរ​ទាំងអស់ ផ្លាស់ប្ដូរមធ្យោបាយធ្វើដំណើរ ឬជិះខ្សែរថភ្លើង​ផ្សេងជាបណ្ដោះ​អាសន្ន ពីព្រោះ​សេវាកម្ម នៅចន្លោះស្ថានីយ​រថភ្លើង ត្សូអិនវ៉ាន (Tsuen Wan Line) និងស្ថានីយកណ្ដាល​ត្រូវបានផ្អាក​សកម្មភាព។

គួរបញ្ជាក់ថា នៅពេលមាន​ហេតុការណ៍បុកគ្នា គឺចំពេលការដាក់ឱ្យអនុវត្តន៍​ប្រព័ន្ធសញ្ញា​បញ្ជាថ្មី ប៉ុន្តែសំណាងល្អដែលរថភ្លើងទាំងពីរ​គ្រឿងខាងលើ មិនមានដឹក​អ្នកដំណើរណា​ម្នាក់នោះទេ។​ ចំណែកឯ​អាជ្ញាធរទីក្រុងហុងកុង កំពុងស៊ើបអង្កេតលើ​គ្រោះថ្នាក់នេះ​ ដែលកម្រនឹងកើន​ឡើងណាស់​លើបណ្ដាញរថភ្លើងដែក ប្រើប្រាស់​ដោយមនុស្សជិត ០៦លាននាក់ជារៀងរាល់​សប្ដាហ៍ នៃ​ថ្ងៃធ្វើការ​នៅទីក្រុង​ហុងកុង៕