(វ៉ាស៊ីនតោន)៖ កងទ័ពអាកាស​អាមេរិកបាន​សម្រេចចិត្ត ផ្ដល់​កិច្ចសន្យា​មួយក្នុងតម្លៃទឹកប្រាក់ ២៥០លានដុល្លារ​ដល់​ក្រុមហ៊ុន Boeing ដើម្បីអភិវឌ្ឍន៍​ប្រព័ន្ធមីស៊ីល​រយៈចំងាយឆ្ងាយ​ សម្រាប់បំពាក់លើយន្ដហោះ​ទម្លាក់​គ្រាប់បែក B-52H ។ នេះបើតាម​ក្រសួងការពារ​ជាតិ​អាមេរិក​ដកស្រង់ដោយ​សារព័ត៌មាន Sputnik នៅ​រសៀល​ថ្ងៃព្រហស្បតិ៍ ទី១៤ ខែមីនា ឆ្នាំ២០១៩។

ការសម្រេចចិត្ត​ខាងលើរបស់ក្រសួង​ការពារជាតិ​អាមេរិក កើតមានឡើង​នៅក្នុងបរិបទដែល​ក្រុមហ៊ុន Boeing កំពុងផុងខ្លួន​ក្នុងវិបត្តិ បន្ទាប់យន្ដហោះ​ត្រកូល 737 Max របស់ខ្លួនធ្លាក់​នៅអេត្យូពី និងបានផ្ដាច់​ជីវិតមនុស្ស ១៥៧នាក់។ នៅក្នុង​សេចក្ដីថ្លែងការណ៍​ចេញផ្សាយនៅថ្ងៃពុធ​សប្ដាហ៍នេះ ក្រសួងការពារជាតិ​អាមេរិកបានលើក​ឡើង​យ៉ាងដូច្នេះថា «ក្រុមហ៊ុន Boeing ទទួលបាន​កិច្ចសន្យា ២៥០លានដុល្លារ​ក្នុងការអភិវឌ្ឍ​ប្រព័ន្ធមីស៊ីល​រយៈចំងាយឆ្ងាយ​ សម្រាប់បំពាក់​លើ​យន្ដហោះ ទម្លាក់​គ្រាប់បែក B-52H... ហើយកិច្ចសន្យា​នេះក៏រាប់បញ្ចូលទាំង​ផ្នែកវិស្វកម្ម ការធ្វើតេស្ដ​ការអភិវឌ្ឍ software ការបណ្ដុះ​បណ្ដាល ការផ្ដល់​ដំណោះស្រាយ និងការគំាទ្រ​ចាំបាច់​នានា»។

គួរបញ្ជាក់ថា កាលពីឆ្នាំ២០១៨ សភាអាមេរិក​បានអនុម័តលើកញ្ចប់ថវិកា​ជាង ៦៦៥លានដុល្លារ សម្រាប់​គម្រោង​អភិវឌ្ឍ ប្រព័ន្ធមីស៊ីស​រយៈចំងាយ​ឆ្ងាយ និងបន្តជីវិត​របស់ក្បាលគ្រាប់​នុយក្លេអ៊ែរ W80 រីឯ ៥៤០លានដុល្លារ​ទៀត​ដើម្បីទ្រទ្រង់ កងកម្លាំង​មីស៊ីលបាលីស្ទីកអន្តរទ្វីបដែលមាន​ស្រាប់៕