(សាន់ហ្វ្រាន់ស៊ីស្កូ)៖ ក្រុមហ៊ុន Facebook បាននិងកំពុងជួប​បញ្ហាធំមួយ ដោយសេវាកម្ម​សំខាន់ៗរបស់ខ្លួន​ស្រាប់តែ​ដំណើរការ​មិន​ប្រក្រតី នៅ​តាមតំបន់ជាច្រើន​ជុំវិញ​ពិភពលោក។ នេះបើតាម​ការដកស្រង់ការផ្សាយ​ចេញពី​ សារព័ត៌មាន BBC នៅព្រឹក​ថ្ងៃ​​ព្រហស្បតិ៍ ទី១៤ ខែមីនា ឆ្នាំ២០១៩។

វែបសាយធំៗទាំង ០២ របស់ក្រុមហ៊ុនគឺ Facebook និង Instagram រួមទាំងកម្មវិធី​ផ្ញើសារ ​សុទ្ធតែ​រងការប៉ះពាល់​​ពី​បញ្ហាខាងលើ ខណៈមូលហេតុនៃ​ការរាំងស្ទាំងដំណើរការ​របស់ពួកវា ពុំទាន់ត្រូវបាន​បញ្ជាក់ជាសាធារណៈនៅ​ឡើយទេ តែ​ក្រុមហ៊ុន​​បណ្តាញសង្គមធំបំផុត​នៅលើពិភពលោក​នេះ​បានប្រាប់ថា គឺមិនមែនបង្កឲ្យ​ដោយសារការ​លុកលុយ DDoS (ការវាយ​ប្រហារ​តាម​ផ្នែក​ព័ត៌មានវិទ្យា​ដែលធ្វើ​ឲ្យកកស្ទះចរាចរណ៍​របស់វែបសាយ​ណាមួយ) នោះទេ។

ដោយសារតែ​បញ្ហានេះ​អ្នកប្រើប្រាស់​ជាច្រើន បានបើក​វែបសាយ Facebook មិនចេញ ខណៈអ្នកខ្លះ Post ​មិនកើត​ព្រម​ទាំង​​​ការ Share មានភាព​រអាក់​រអួល។ រីឯអ្នក​ប្រើប្រាស់ Instagram មិនអាច Refresh ផ្ទាំង Feeds ឬក៏បង្ហោះរូបភាព​ថ្មីៗ​បាន​ឡើយ​​។ សម្រាប់​កម្មវិធី Messenger របស់​កុំព្យូទ័រ Desktop គឺបើក​មិនចេញ ខណៈរបស់ទូរស័ព្ទ​ដៃអាចផ្ញើសារ​បានខ្លះៗ ហើយ​កម្មវិធី WhatsApp ក៏បានជួបបញ្ហា​ស្រដៀង​គ្នា​នេះដែរ។

គួរជម្រាបថា លើកចុងក្រោយបំផុត​ដែល Facebook បានជួបបញ្ហា​រអាក់រអួលទ្រង់ទ្រាយធំ​បែបនេះ​ គឺកាលពី​ឆ្នាំ២០០៨ នៅ​ពេល​ដែល​​ក្រុមហ៊ុនបណ្តាញ​សង្គមនេះមាន​អ្នកប្រើប្រាស់ ១៥០លាននាក់ ធៀបនឹង​ប្រមាណ ២.៣ពាន់លាននាក់នាពេលសព្វថ្ងៃនេះ៕