(ពិភពលោក)៖ នៅថ្ងៃពុធ ទី១៣ ខែមីនា ឆ្នាំ២០១៩នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ មន្ទីរបញ្ចកោណនៃក្រសួងការពារជាតិអាមេរិក មានគម្រោងចំណាយប្រាក់ ២.៦ពាន់លានដុល្លារលើការអភិវឌ្ឍអាវុធលឿនជាងសំឡេង និងអាវុធវៃឆ្លាត ខណៈអ្នកជំនាញជាច្រើនបានព្រមានថា ការរត់ប្រណាំងសព្វាវុធនៃសង្រ្គាមត្រជាក់ រវាងមហាអំណាចយោធាទាំង ២ អាមេរិក និងរុស្ស៊ីអាចនឹងផ្ទុះឡើងជាថ្មី៕
២៖ របាយការណ៍មួយរបស់ក្រុមអ្នកជំនាញអង្គការសហប្រជាជាតិ បានឱ្យដឹងថា កូរ៉េខាងជើងនៅតែធ្វើសកម្មភាពរំលោភ លើទណ្ឌកម្មអន្តរជាតិ តាមរយៈការបង្កើនការនាំចូលប្រេង និងនាំចេញធ្យូងថ្មណីក្រៅប្រទេសដដែល៕
៣៖ រដ្ឋមន្ត្រីការបរទេសវៀតណាមលោក ផាម ប៊ិញមិញ (Pham Binh Minh) បានពិភាក្សាតាមទូរស័ព្ទជាមួយសមភាគីម៉ាឡេស៊ី ដោយស្នើសុំឱ្យទីក្រុងគូឡាឡំាពួរ ដោះលែងស្ត្រីជាជនជាតិវៀតណាមម្នាក់ ដែលត្រូវបានចោទប្រកាន់ពីបទសម្លាប់បងប្រុសម្ដាយទីទៃ នៃមេដឹកនាំកូរ៉េខាងជើង លោក គីម ជុងអ៊ុន គឺលោក គីម ជុងណំា៕
៤៖ ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ បានឲ្យដឹងថា លោកនឹងស្នើសុំជំនួយពី រុស្ស៊ី ចិន គុយបា អ៊ីរ៉ង់ រួមទាំងអង្គការសហប្រជាជាតិ ក្នុងការស៊ើបអង្កេតជុំវិញអ្វីដែលរូបលោកបានអះអាងថា ជាការវាយប្រហារមកលើបណ្តាញផ្គត់ផ្គង់អគ្គិសនីប្រទេសលោក ដែលបានបង្កឲ្យមានការដាច់ចរន្តអគ្គិសនីស្ទើរតែទូទាំងប្រទេស អស់ជាច្រើនថ្ងៃមកហើយ៕
៥៖ កងទ័ពអាកាសប៉ាគីស្ថានបានធ្វើតេស្ដបាញ់សាកល្បង ប្រកបដោយជោគជ័យ នូវមីស៊ីលឆ្លាតវៃផលិតនៅក្នុងស្រុកស៊េរីថ្មីបំផុតមួយ ខណៈភាពតានតឹងជាមួយឥណ្ឌា នៅមិនទាន់ធូរស្រាលខ្លាំងនៅឡើយ៕
៦៖ ទីភ្នាក់ងារសុវត្ថិភាពអាកាសចរណ៍ស៊ីវិលសហភាពអឺរ៉ុប បានប្រកាសផ្អាករាល់ប្រតិបត្តិការហោះហើររបស់យន្ដហោះ Boeing 737 MAX ហើយ បន្ទាប់ពីសោកនាដកម្មធ្លាក់យន្ដហោះនៅអេត្យូពី៕
