(វ៉ាស៊ីនតោន)៖ សហរដ្ឋអាមេរិកកំពុងមានការព្រួយបារម្ភជាខ្លាំង ជុំវិញលទ្ធភាពដែលថា ប្រទេសអ៊ីតាលីអាចនឹងចូលរួមក្នុងគម្រោងប្រកបដោយមហិច្ឆតាគឺ «ខ្សែក្រវាត់និងផ្លូវ» របស់ប្រទេសចិន។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅរសៀលថ្ងៃពុធ ទី១៣ ខែមីនា ឆ្នាំ២០១៩។
កាលពីចុងសប្តាហ៍មុន ឧបនាយករដ្ឋមន្រ្តីប្រទេសអ៊ីតាលីលោក លុយជី ឌូ ម៉ៃយ៉ូ (Luigi Di Maio) បានប្រកាសថា អ៊ីតាលីកំពុងព្យាយាមចូលរួមក្នុងគម្រោង «ខ្សែក្រវាត់ និងផ្លូវ» ដើម្បីជំរុញសន្ទុះការនាំចេញនៃប្រទេសរបស់លោក។ ម៉្យាងវិញទៀតនាយករដ្ឋមន្រ្តីអ៊ីតាលី លោក ហ្គីសិពប៉េ ខុនតេ (Giuseppe Conte) ក៏បានបញ្ជាក់ផងដែរថា លោកអាចនឹងចុះកិច្ចព្រមព្រៀងក្នុងក្របខ័ណ្ឌមួយជាមួយប្រធានាធិបតីចិនលោក ស៊ី ជិនពីង ដើម្បីចូលរួមក្នុងគម្រោង «ខ្សែក្រវាត់ និងផ្លូវ»។
កាលពីសប្តាហ៍កន្លងទៅ អ្នកនាំពាក្យនៃក្រុមប្រឹក្សាសន្តិសុខជាតិអាមេរិក លោក ហ្គារ៉េត ម៉ាឃ្វីស (Garrett Marquis) បានប្រាប់សារព័ត៌មាន Financial Times ថា គម្រោង «ខ្សែក្រវាត់ និងផ្លូវ» គឺផ្តល់ប្រយោជន៍ឲ្យតែចិនប៉ុណ្ណោះ ដោយអ៊ីតាលីនឹងមិនទទួលផលឡើយ។ រីឯ Financial Times បានកត់សម្គាល់ថា សហរដ្ឋអាមេរិកមានការមិនពេញចិត្តជាខ្លាំង ដោយសារតែលទ្ធភាពដែលថា អ៊ីតាលីនឹងចូលរួមក្នុងគម្រោងមួយនេះ និងបានព្រមានថា គម្រោង «ខ្សែក្រវាត់ និងផ្លូវ» របស់ប្រទេសចិនអាចបំផ្លាញមុខមាត់របស់អ៊ីតាលី នៅលើឆាកអន្តរជាតិបាន។
សម្រាប់ចិនផ្ទាល់វិញ ការលើកឡើងបែបនេះរបស់អាមេរិកត្រូវបានចាត់ទុកថា ជារឿងមិនសមហេតុសមផលទាល់តែសោះ ដោយក្រសួងការបរទេសចិនបានគូសបញ្ជាក់ថា អ៊ីតាលីដឹងយ៉ាងច្បាស់អំពីផលប្រយោជន៍របស់ពួកគេ ហើយមានសមត្ថភាពគ្រប់គ្រាន់ ដើម្បីអភិវឌ្ឍន៍គោលនយោបាយ និងឥរិយាបថដោយខ្លួនឯងផ្ទាល់ ចំពោះគម្រោងផ្តួចផ្តើមរបស់ចិនខាងលើនេះ។
គួរជម្រាបថា ទាក់ទិននឹងបញ្ហាខាងលើបើតាមក្រុមអ្នកវិភាគអន្តរជាតិ គឺសហរដ្ឋអាមេរិកភ័យព្រួយថា អ៊ីតាលីដែលជាតំណភ្ជាប់ទន់ខ្សោយមួយនៅក្នុងសេដ្ឋកិច្ចអឺរ៉ុប ហើយជាពិសេសគឺក្នុងចំណោមប្រទេសសេដ្ឋកិច្ចជឿនលឿន G7 តែម្តងនោះ អាចនឹងក្លាយជា «សេះបញ្ឆោត Trojan» សម្រាប់ឲ្យចិនប្រើប្រាស់ ដោយក្នុងន័យនេះគឺអ៊ីតាលីអាចអនុញ្ញាតឲ្យចិនទម្លុះចូលក្នុងសេដ្ឋកិច្ចអឺរ៉ុប ហើយពង្រីកឥទ្ធិពលរបស់ខ្លួន ដែលនេះហើយគឺជាអ្វីទីក្រុងវ៉ាស៊ីនតោនព្រួយបារម្ភបំផុតនោះ៕
