(សិង្ហបុរី)៖ ក្រុមហ៊ុន​អាកាសចរណ៍ SilkAir របស់សិង្ហបុរី​បានឲ្យដឹងនាថ្ងៃចន្ទ​នេះថា យន្តហោះប្រភេទ Boeing 737 MAX 8 របស់​ខ្លួន កំពុងបន្តធ្វើប្រតិបត្តិការ​ជាធម្មតា ប៉ុន្តែ​អាកាសចរណ៍ក៏​កំពុងតាមឃ្លាំមើលស្ថានការណ៍​យ៉ាងដិតដល់ ក្រោយសោកនាដ​កម្ម​​​ធ្លាក់​​យន្តហោះស៊េរីថ្មី​នេះ​​​របស់អាកាសចរណ៍​អេត្យូពី។ នេះបើតាមការ​ដកស្រង់ការផ្សាយចេញ​ពីសារព័ត៌មាន Channel News Asia នៅល្ងាចថ្ងៃចន្ទ ទី១១ ខែមីនា ឆ្នាំ២០១៩។

SilkAir ដែលជាអាកាសចរណ៍​ថ្នាក់តំបន់​របស់​ក្រុមហ៊ុន​អាកាសចរណ៍​សិង្ហបុរី Singapore Airlines បានឲ្យដឹងថា ពួកគេកំពុងតែ​​តាមដានស្ថានការណ៍​យ៉ាងដិតដល់ ខណៈដែល​យន្តហោះ Boeing 737 MAX 8 របស់ក្រុមហ៊ុន បន្តធ្វើប្រតិបត្តិការ​តាម​កាល​វិភាគ​ជាធម្មតា។ បច្ចុប្បន្ន SilkAir មាន Boeing 737 MAX 8 ចំនួន ០៦គ្រឿង និង ៣១គ្រឿងទៀត​ស្ថិតក្រោមការ​បញ្ជាទិញ។ ​​បើ​តាមវែបសាយ​តាមដានសេវាជើង​ហោះហើរ Flightradar24 យន្តហោះទាំង ០៦គ្រឿងនេះ មានគោលដៅ​ធ្វើដំណើរឆ្ពោះទៅ​​កាន់​គោលដៅ​ខុសៗគ្នា នៅក្នុងតំបន់អាស៊ី និងអូស្រ្តាលី។

គួរជម្រាបថា នៅថ្ងៃអាទិត្យម្សិលមិញនេះ យន្តហោះមានជើងហោះហើរ ET302 របស់អាកាសចរណ៍ Ethiopian Airlines ​​​ដែល​ជាប្រភេទ Boeing 737 MAX 8 បានធ្លាក់ក្រោយហោះឡើងផុតពីដីតែប៉ុន្មាននាទីប៉ុណ្ណោះ ពីព្រលានយន្តហោះនៅឯរដ្ឋធានី Addis Ababa ដែលបណ្តាយឲ្យមនុស្សនៅលើនោះ ១៥៧នាក់ស្លាប់ទាំងអស់។

ហេតុការណ៍ខាងលើនេះ គឺជាករណីធ្លាក់ជាលើក​ទីពីរហើយ នៃយន្តហោះ 737 MAX 8 របស់ក្រុមហ៊ុន Boeing ដែលជាម៉ូដែល​ថ្មីទើបតែ​​បានធ្វើហោះហើរ​ជា​លើកដំបូង​កាលពីឆ្នាំ​២០១៧​ប៉ុណ្ណោះ ដោយកន្លងមកយន្តហោះនេះ បានលេចមុខព្រោង​ព្រាត​​នៅ​លើបណ្តាញ​សារព័ត៌មាន គឺពីព្រោះតែក្តី​ព្រួយបារម្ភផ្នែកសុវត្ថិភាព ក្រោយការធ្លាក់​យន្តហោះរបស់​អាកាសចរណ៍ Lion Air ដែលបានផ្តាច់ជីវិត​មនុស្សទាំងអស់​ដូចគ្នា​គឺ ១៨៩នាក់ ក្រោយហោះចេញ​ពីទីក្រុងហ្សាការតា​បានត្រឹម ១៣នាទី ហើយ​ធ្លាក់​ចូល​​ទៅក្នុងសមុទ្រ៕