(ម៉ុងហ្គោលី)៖ អាជ្ញាធរអាកាសចរណ៍​ស៊ីវិល​​ម៉ុងហ្គោលី ក្នុងចំណោមប្រទេស​មួយចំនួនទៀត នាថ្ងៃចន្ទនេះ​បាន​​​បង្គាប់ឲ្យ ក្រុម​ហ៊ុន​អាកាសចរណ៍ជាតិ​នៃប្រទេសនេះ MIAT ផ្អាកជា​បណ្តោះអាសន្ន​នូវប្រតិបត្តិការ​នៃ​​យន្តហោះ Boeing 737 MAX 8 ដើម្បី​ធ្វើការត្រួតពិនិត្យ​ផ្នែក​បច្ចេកទេស។ នេះបើ​តាមការដកស្រង់​ការផ្សាយចេញ​ពី ទីភ្នាក់ងារ​ព័ត៌មានចិន​ស៊ីនហួរ នៅរសៀល​ថ្ងៃចន្ទ ទី១១​ ខែមីនា ឆ្នាំ២០១៩។

ការធ្វើបែបនេះ គឺដោយសារតែ​នៅថ្ងៃអាទិត្យម្សិលមិញ យន្តហោះ Boeing 737 MAX 8 របស់​អាកាសចរណ៍​​អេត្យូពី ​ដែលមាន​​​គោលដៅធ្វើដំណើរ​​ពី​រដ្ឋធានី អេដឌីសអាបាបា (Addis Ababa) ឆ្ពោះទៅ​រដ្ឋធានី ណៃរ៉ូប៊ី (Nairobi) របស់កេនយ៉ា បានធ្លាក់ក្រោយ​​ពីហោះហើរ​ត្រឹម​០៦នាទី ​​ហើយពុំមាននរណា​ម្នាក់ដែលជិះនៅលើយន្តហោះ បានរួចរស់ជីវិត​ឡើយ។ ​អ្វីដែល​សំខាន់នោះ គឺវាជាករណីទីពីរហើយ​ដែល​យន្តហោះស៊េរីថ្មីនេះ​​បានធ្លាក់ ដោយកាលពី​ខែតុលា ឆ្នាំ២០១៨ Boeing 737 MAX 8 របស់អាកាសចរណ៍​ឥណ្ឌូណេស៊ី Lion Air ​បានធ្លាក់ចូល​សមុទ្រ​នៅក្បែរ​រដ្ឋធានីហ្សាការតា ដោយផ្តាច់យក​ទាំងជីវិតមនុស្ស​សរុប ១៨៩នាក់ទៅជាមួយ។

គួរជម្រាបថា អាកាសចរណ៍ជាតិ​ម៉ុងហ្គោល MIAT បានទទួល​យន្តហោះ Boeing 737 MAX 8 មួយគ្រឿង នៅថ្ងៃទី២១ ខែកុម្ភៈ ដែលវាគឺជាការប្រគល់​យន្តហោះគ្រឿងដំបូង ក្នុងចំណោម 737 MAX ចំនួន ០៤គ្រឿង ដែលខ្លួនបានបញ្ជាទិញ។ ក្រៅពី MIAT ​​ចិនក៏បានបង្គាប់​ឲ្យរាល់អាកាសចរណ៍របស់ខ្លួន​ ផ្អាកការប្រើប្រាស់ Boeing 737 MAX 8 ដែរ ហើយ​អាកាសចរណ៍ Ethiopian Airlines ផ្ទាល់គឺដូចគ្នា។

ដោយសារតែបញ្ហានេះ ​Boeing បាន​សម្រេចផ្អាក​ការបញ្ចេញ​យន្តហោះ 777X ថ្មី​របស់ខ្លួន ដែលត្រូវ​បាន​គ្រោង​ថា នឹង​រៀបចំធ្វើឡើងនៅថ្ងៃពុធ​សប្តាហ៍នេះ៕