(អេដឌីសអាបាបា)៖ អាកាសចរណ៍​អេត្យូពី (Ethiopian Airlines) បាន​សម្រេច​ចិត្ត​​ផ្អាក​ធ្វើ​ប្រតិបត្តិការយន្តហោះដឹក​អ្នកដំណើរ​ប្រភេទ Boeing 737 MAX 8 ដែល​ខ្លួន​បានទិញពីក្រុមហ៊ុន​អាមេរិក Boeing ដើម្បី​ធ្វើការពិនិត្យផ្នែកបច្ចេកទេសឡើងវិញ ក្រោយ​កើតមានករណី​ធ្លាក់យន្តហោះប្រភេទថ្មីមួយគ្រឿង កាលពីថ្ងៃព្រឹក​ថ្ងៃអាទិត្យ ទី១០ ខែមីនា បណ្តាល​ឲ្យមនុស្ស​ ១៥៧នាក់ស្លាប់។ នេះបើតាម​ការចេញផ្សាយ​ដោយសារព័ត៌មាន ស៊ីនហួរ នារសៀល​ថ្ងៃចន្ទ ទី១១ ខែមីនា ឆ្នាំ២០១៩។

តាមរយៈបណ្តាញ​សង្គម Twitter ផ្លូវការ​របស់ Ethiopian Airlines អាកាសចរណ៍​​នៃ​តំបន់អាហ្វ្រិកមួយនេះ​បានសម្រេច «ផ្អាកជាបណ្តោះ​អាសន្ននូវ​យន្តហោះ Boeing 737 MAX 8 ដើម្បីធ្វើការត្រួត​ពិនិត្យបច្ចេកទេស​បន្ថែម បើទោះបីជា​ពុំទាន់​មាន​ព័ត៌មានណាមួយ បញ្ជាក់ថា ជើងហោះហើរ ET 302/10 បានធ្លាក់ដោយសារមូលហេតុអ្វី​ឲ្យពិតប្រាកដ​នោះក៏ដោយ»។ ជើងហោះ​ហើរ ET 302/10 បានធ្លាក់​នៅចម្ងាយ ៤៥គីឡូម៉ែត្រពី​ព្រលាន​យន្តហោះ​ទីក្រុង អេដឌីស អាបាបា ក្រោយពីទើបហោះ​ឡើងបាន​៦នាទីប៉ុណ្ណោះ។

គួរបញ្ជាក់ថា អាកាសចរណ៍​អេត្យូពី​មានយន្តហោះ​ប្រភេទខាងលើ​នេះ សរុបចំនួន ០៨គ្រឿង ហើយ​សម្រាប់​ជើង​ហោះហើរ ET 302/10 ដែលបានធ្លាក់​កាលពី​ថ្ងៃអាទិត្យនោះ គឺ​ទើបតែ​បានបម្រើការងារ​មិនទាន់បានមួយឆ្នាំស្រួល​បួលផង។ ក្រៅពីអេត្យូពី នៅព្រឹក​ព្រហាមថ្ងៃចន្ទ​នេះតែម្តង អាជ្ញាធរអាកាសចរណ៍​ស៊ីវិលចិន បានបញ្ជាឲ្យក្រុមហ៊ុន​អាកាសចរណ៍​​ក្នុងស្រុក​ទាំងអស់ផ្អាកជាបណ្តោះអាសន្ន នូវរាល់ប្រតិបត្តិការ​យន្តហោះ Boeing 737 MAX 8 រហូតដល់​ការធានាសុវត្ថិភាព​ត្រូវបាន​ធ្វើឡើង៕