(អ៊ីតាលី)៖ អ្នកនាំពាក្យទីប្រឹក្សាសន្តិសុខជាតិសេតវិមានអាមេរិក លោក Garrett Marquis បានជម្រុញឱ្យអ៊ីតាលី បោះបង់ចោលគម្រោងចូលរួមក្នុងគំនិតផ្ដួចផ្ដើម«ខែ្សវាត់ និងផ្លូវ» របស់ចិន​ដោយចាត់ទុកថាវាគឺជាគម្រោងឥតប្រយោជន៍។ នេះបើតាមការចេញផ្សាយដោយសារព័ត៌មាន Sputnik នៅថ្ងៃអាទិត្យ ទី១០ ខែមីនា ឆ្នាំ២០១៩។

ថ្លែងនៅលើ Twitter លោក Marquis បានគូសបញ្ជាក់ដូច្នេះថា៖ «អ៊ីតាលីគឺជាគោលដៅវិនិយោគដ៏អស្ចារ្យ និងសេដ្ឋកិច្ចដ៏ធំ នៅលើពិភពលោក...ប៉ុន្តែរដ្ឋាភិបាលមិនគួរចូលរួម ឬគាំទ្រគំនិតផ្ដួចផ្ដើម«ខែ្សវាត់ និងផ្លូវ»របស់ចិននោះទេ ព្រោះវាគ្រាន់តែជា គម្រោងគ្មានប្រយោជន៍មួយប៉ុណ្ណោះ»។

គួរបញ្ជាក់ថា ការលើកឡើងខាងលើរបស់លោក Garrett Marquis កើតមានឡើងបន្ទាប់ពីនាយករដ្ឋមន្ត្រីអ៊ីតាលី លោក Giuseppe Conte បានអះអាងនៅក្នុងខែមីនានេះថា​លោកកំពុងពិចារណាចូលរួមក្នុងគំនិតផ្ដួចផ្ដើម«ខែ្សវាត់ និងផ្លូវ»របស់ចិន ខណៈប្រធានាធិបតីចិន លោក ស៊ី ជិនពីង ត្រូវបានគេរំពឹងថានឹងបំពេញទស្សនកិច្ចទៅកាន់ប្រទេសអ៊ីតាលី ពីថ្ងៃទី២២ ដល់ថ្ងៃទី២៤ ខែមីនានេះ៕