(ម៉ិចស៊ីកូ)៖ ករណីបាញ់ប្រហារមួយត្រូវបានបង្កឡើងដោយក្រុមខ្មាន់កាំភ្លើង ទៅលើក្លឹបកម្សាន្តពេលរាត្រីមួយកន្លែងក្នុងទីក្រុង សាឡាមែនកា (Salamanca) ក្នុងរដ្ឋហ្គាណាហ្សូតូ (Guanajuato) នៃប្រទេសម៉ិចស៊ីកូបណ្តាលឲ្យមនុស្ស ១៤នាក់ស្លាប់ភ្លាមៗនៅហ្នឹងកន្លែងកើតហេតុ និង០៧នាក់ទៀតរងរបួសត្រូវបានបញ្ជូនទៅមន្ទីរពេទ្យក្រុង។ នេះបើតាមការចេញផ្សាយដោយ Sputnik នាល្ងាចថ្ងៃសៅរ៍ ទី០៩ ខែមីនា ឆ្នាំ២០១៩។
ក្រុមខ្មាន់កាំភ្លើងដែលមិនទាន់មានគេស្គាល់ប្រភពខាងលើនេះ បានសម្រុកចូលទៅក្នុងក្លឹប La Playa Men នៅក្នុងទីក្រុងខាងលើ ហើយបានបង្កការបាញ់រះទៅលើក្រុមភ្ញៀវដែលចូលកម្សាន្តក្លឹបរាត្រីនោះតែម្តងនៅយប់ថ្ងៃសុក្រ (ម៉ោងនៅម៉ិចស៊ីកូ) ហើយក្រោយមកពួកគេក៏បានរត់គេចខ្លួនបាត់ស្រមោលទាំងក្រុម។
គួរបញ្ជាក់ថា ក្រោយពីកើតហេតុភ្លាមៗ កងកម្លាំងប៉ូលិសម៉ិចស៊ីកូបានមកដល់ និងអះអាងថា មនុស្សចំនួន ១៤នាក់បានស្លាប់ និង០៧នាក់រងរបួសតែម្តង។ មិនទាន់មានការបញ្ជាក់ថា តើរឿងនេះមានជាប់ពាក់ព័ន្ធនឹងក្រុមឧក្រិដ្ឋជនគ្រឿងញៀនដែរ ឬក៏យ៉ាងណានោះឡើយ ខណៈប៉ូលិសកំពុងតែបន្តការស៊ើបអង្កេត៕
