(វ៉ាស៊ីនតោន)៖ ប្រធានាធិបតីប្រេស៊ីលលោក ហ្ស៊ែរ បូលសូណារ៉ូ (Jair Bolsonaro) នឹងជួបជាមួយនឹងប្រធានាធិបតីអាមេរិកលោក ដូណាល់ ត្រាំ នៅថ្ងៃទី១៩ ខែមីនា ខាងមុខនេះក្នុងរដ្ឋធានីវ៉ាស៊ីនតោន ដើម្បីពិភាក្សាអំពីបញ្ហាសន្តិសុខក្នុងតំបន់អាមេរិកឡាទីន ក្នុងនោះស្ថានការណ៍នៅប្រទេសវេណេស៊ុយអេឡាជាចម្បង។ នេះបើតាមការចេញផ្សាយដោយ Sputnik ដកស្រង់សេចក្តីប្រកាសពីសេតវិមានទីក្រុងវ៉ាស៊ីនតោន នារសៀលថ្ងៃសៅរ៍ ទី០៩ ខែមីនា ឆ្នាំ២០១៩។
សេចក្តីប្រកាសព័ត៌មានពីសេតវិមានអាមេរិក បានឲ្យដឹងយ៉ាងដូច្នេះថា «លោកប្រធានាធិបតី ដូណាល់ ត្រាំ នឹងទទួលស្វាគមន៍ដំណើរមកដល់ នៃប្រធានាធិបតីប្រេស៊ីលលោក Jair Bolsonaro នៅឯសេតវិមាននាថ្ងៃអង្គារ ទី១៩ ខែមីនាខាងមុខនេះ...។ មេដឹកនាំទាំងពីរនឹងធ្វើការពិភាក្សាគ្នាអំពីការធ្វើឲ្យប្រសើរឡើង នូវលទ្ធិប្រជាធិបតេយ្យនៃពិភពខាងលិច ប្រកបដោយវិបុលភាព និងសន្តិសុខ...។ ប្រទេសទាំងពីរនឹងសន្យាដើរតួនាទីឲ្យកាន់តែច្រើន ដើម្បីផ្តល់ជំនួយមនុស្សធម៌ ទៅកាន់ប្រទេសវេណេស៊ុយអេឡា...។»
គួរបញ្ជាក់ថា លោក Jair Bolsonaro ដែលទើបជាប់ឆ្នោត និងឡើងកាន់តំណែងជាប្រធានាធិបតីប្រេស៊ីលថ្មីថ្មោងផងដែរនោះ គឺត្រូវបានគេមើលឃើញថា ជាមេដឹកនាំដែលមកបន្តដំណើរការនយោបាយគាំទ្រសហរដ្ឋអាមេរិក ខណៈចំពោះមុខវិបត្តិនៅវេណេស៊ុយអេឡានេះ ប្រេស៊ីលបានបង្ហាញជំហរគាំទ្រក្រុមប្រឆាំងរបសលោក ហ្គៃដូ តាមសហរដ្ឋអាមេរិក និងបានព្យាយាមដឹកនាំជំនួយមនុស្សធម៌ ដើម្បីចូលទៅក្នុងប្រទេសវេណេស៊ុយអេឡាផងដែរ ប៉ុន្តែរដ្ឋាភិបាលលោក ម៉ាឌូរ៉ូ ដែលជាអ្នកគ្រប់គ្រងសន្តិសុខប្រទេសនេះទាំងស្រុង មិនបានអនុញ្ញាតឲ្យចូលនោះឡើយ ដោយចាត់ទង្វើប្រេស៊ីលជាចេតនាត្រៀមឈ្លានពាន៕
