(ហែលស៊ីនគី)៖ នាយករដ្ឋមន្រ្តីហ្វាំងឡង់លោក ជូហា ស៊ីភូឡា (Juha Sipila) បានសម្រេចដាក់ពាក្យលាលែងនៃរដ្ឋាភិបាលរបស់លោក (ឬស្មើរំលាយរដ្ឋាភិបាល) នៅថ្ងៃសុក្រនេះ ក្រោយពីគម្រោងធំបំផុតរបស់ខ្លួន គឺការធ្វើកំណែទម្រង់ផ្នែកសុខាភិបាល និងផ្នែកសេវាថែទាំក្នុងសង្គម បានទទួលរងភាពបរាជ័យនៅក្នុងសភា។ នេះបើតាមការដកស្រង់ការផ្សាយចេញពីសារព័ត៌មាន Bloomberg នៅរសៀលថ្ងៃសុក្រ ទី០៨ ខែមីនា ឆ្នាំ២០១៩។
លោក Sipila បានចូលជួបជាមួយប្រធានាធិបតីហ្វាំងឡង់ លោក សូលី នីអ៊ីនីស្តូ (Sauli Niinisto) នាព្រឹកថ្ងៃសុក្រនេះ (ម៉ោងក្នុងតំបន់) នៅក្នុងរដ្ឋធានីហែលស៊ីនគី ដើម្បីប្រគល់ជូនលោក Niinisto នូវលិខិតសុំលាលែងពីតំណែង ហើយលោកប្រធានាធិបតីហ្វាំងឡង់ក៏បានទទួលយកការសុំចុះចេញពីតំណែងនេះផងដែរ។ ជាមួយគ្នានេះ លោក Sipila ក៏ត្រូវគេរំពឹងថា នឹងស្នើឲ្យលោក Niinisto រំលាយសភានៅក្នុងថ្ងៃដដែលនេះថែមទៀតផង។
គួរជម្រាបថា ដំណឹងខាងលើបានលេចឡើង ស្របពេលដែលប្រទេសហ្វាំងឡង់កំពុងត្រៀមរៀបចំខ្លួនសម្រាប់ការបោះឆ្នោតសកល ដែលនឹងប្រព្រឹត្តទៅនៅថ្ងៃទី១៤ ខែមេសា ខាងមុខ។ ទោះបីជារដ្ឋាភិបាលត្រូវរំលាយក្តី លោកប្រធានាធិបតីហ្វាំងឡង់ បានស្នើទៅគណៈរដ្ឋមន្ត្រី និងលោក Juha Sipila ឲ្យបន្តការងាររបស់ក្នុងខ្លួន ក្នុងស្ថានភាពជារដ្ឋាភិបាលស្តីទី ឬបណ្តោះអាសន្ន៕
