(ប៊ែរឡាំង)៖ រដ្ឋមន្ត្រីសេដ្ឋកិច្ច​អាល្លឺម៉ង់ លោក ភឺធើ អាល់មែរ (Peter Altmaier) បាននិយាយថា រដ្ឋាភិបាលទីក្រុងប៊ែរឡាំង​នឹង​មិនហាមឃាត់​ក្រុមហ៊ុនបច្ចេកវិទ្យា​ទូរគមនាគមន៍ Huawei ក្នុងការ​អភិវឌ្ឍ និងកសាង​ប្រព័ន្ធ 5G នោះទេ បើទោះជា​សហរដ្ឋអាមេរិក​កំពុងដឹកនាំយុទ្ធនាការប្រឆាំង​ នឹងក្រុមហ៊ុនយក្សចិន​មួយនេះ​ក៏ដោយ។ នេះបើតាម​ការចេញផ្សាយដោយ​សារព័ត៌មាន Sputnik នៅរសៀល​ថ្ងៃសុក្រ ទី០៨ ខែមីនា ឆ្នាំ២០១៩។

លោក Peter Altmaier ធ្វើការកត់​សម្គាល់បែបនេះ នៅក្នុងបទ​សម្ភាសន៍ជាមួយទូរទស្សន៍​អាល្លឺម៉ង់មួយ នៅថ្ងៃពុធសប្ដាហ៍​នេះ និងជាការឆ្លើយតប​ទៅនឹងសំណួរដែលសួរថា តើរដ្ឋាភិបាលអាល្លឺម៉ង់​មានគម្រោងហាមឃាត់​ក្រុមហ៊ុន Huawei ក្នុងការអភិវឌ្ឍ​ប្រព័ន្ធទូរស័ព្ទដៃ​ចល័ត 5G ដែរទេ។ បន្ថែមពីលើនេះ ការលើកឡើង​របស់លោក Altmaier កើតមានឡើង​បន្ទាប់ពីទី​ភ្នាក់ងារ​បណ្ដាញ Network អាល្លឺម៉ង់​បានចេញផ្សាយ​នូវបទបញ្ជាសន្តិសុខ​មួយ លើរាល់ក្រុមហ៊ុន​ទូរគមនាគមន៍​ទាំងអស់ ជាមួយការស្នើ​ឱ្យអ្នកផ្គត់ផ្គង់​ប្រព័ន្ធ 5G ត្រូវតែមាន​ភាពទៀង​ត្រង់។ បទបញ្ជានេះ​ក៏បានបញ្ជាក់ដែរថា រាល់បណ្ដាញ Network ទាំងអស់ត្រូវ តែប្រើប្រាស់​សមាសភាព​ពីក្រុមហ៊ុន​ជាច្រើន។

គួរជម្រាបថា បច្ចុប្បន្ន​សហរដ្ឋអាមេរិកកំពុងដឹកនាំ​យុទ្ធនាការប្រឆាំង​នឹងការអភិវឌ្ឍ​ប្រព័ន្ធ 5G របស់ក្រុមហ៊ុន Huawei ដោយចោទថា ក្រុមហ៊ុន​ចិនមួយ​នេះបាន​និងកំពុងធ្វើចារកម្ម​ឱ្យរដ្ឋាភិបាល​ទីក្រុង​ប៉េកាំង បើទោះជា​​ក្រុមហ៊ុន Huawei បានបដិសេធ​ក៏ដោយ។ ក្រសួង​ការបរទេសចិន​នៅថ្ងៃព្រហស្បតិ៍​សប្តាហ៍នេះ បានចាត់ទុកការចោទប្រកាន់ និងទង្វើរុកគួនដោយ​អាជ្ញាធរអាមេរិកលើ​ក្រុមហ៊ុន Huawei គឺជារឿង​នយោបាយ ខណៈ Huawei នៅថ្ងៃដដែល​​បានប្រកាសដាក់ពាក្យប្តឹងរដ្ឋាភិបាលអាមេរិក​ជាផ្លូវការ៕