(គូឡាឡាំពួរ)៖ នាយករដ្ឋមន្ត្រីម៉ាឡេស៊ី លោក មហាធៀ មហាម៉េដ បាននិយាយថាបើសិនជាស្ថិតនៅក្នុងកាលៈទេសៈបង្ខំឱ្យ ជ្រើសរើស នោះលោកនឹងឈរនៅខាងចិនដែលជាអ្នកមាន ជាជាងចាប់យកសហរដ្ឋអាមេរិកដែលនិយាយបាតដៃខ្នងដៃ។ នេះ បើតាមការចេញផ្សាយដោយសារព័ត៌មាន South China Morning Post នៅថ្ងៃសុក្រ ទី០៨ ខែមីនា ឆ្នាំ២០១៩។

ការកត់សម្គាល់ខាងលើរបស់លោក មហាធៀ ធ្វើឡើងនៅក្នុងបទសម្ភាសន៍ផ្ដាច់មុខជាមួយអ្នកសារព័ត៌មាន South China Morning Post នៅក្នុងសប្ដាហ៍នេះ។ ថ្លែងនាឱកាសនោះ នាយករដ្ឋមន្ត្រីវ័យ៩៣ឆ្នាំរូបនេះ ក៏បានលើកឡើងផងដែរថាអំណាច របស់សហរដ្ឋអាមេរិកគឺជាកតា្តអវិជ្ជមាន ហើយថាសង្រ្គាមជាមួយចិន គឺគ្រាន់តែជាយុទ្ធសាស្ត្រមួយមិនបានផ្ដល់ប្រយោជន៍ អ្វីក្រៅតែពីភាពអវិជ្ជមាន និងជម្លោះឡើយ។ លោក មហាធៀ បានបន្ថែមដូច្នេះថា៖ «នៅពេលចិនក្រីក្រ យើងភ័យខ្លាច ចំពោះចិន ហើយនៅពេលដែលចិនមានបាន យើងក៏នៅតែខ្លាចចិនដដែល...ប៉ុន្តែខ្ញុំគិតថាយើងគួរតែស្វែងរកមធ្យោបាយ ដោះស្រាយជាមួយចិន។ ម្យ៉ាងទៀត បើស្ថិតនៅក្នុងកាលៈទេសៈបង្ខំឱ្យជ្រើសរើស នោះខ្ញុំនឹងឈរនៅខាងចិនដែលជាអ្នកមាន ជាជាងចាប់យកសហរដ្ឋអាមេរិកដែលនិយាយបាតដៃខ្នងដៃ»។

គួរបញ្ជាក់ថា បើតាមលោក មហាធៀ មហាម៉េដ បច្ចុប្បន្នម៉ាឡេស៊ីបានទទួលស្គាល់ថាមានទំនាក់ទំនងកាន់តែខិតទៅរកចិន ដែលជាទីផ្សារដ៏ធំ ហើយថាប្រទេសរបស់លោកចង់ទាញយកប្រយោជន៍ពីការរីករើននៃសេដ្ឋកិច្ចចិន៕