(ព្យុងយ៉ាង)៖ កូរ៉េខាងជើង​នៅថ្ងៃព្រហស្បតិ៍នេះ បានចេញមុខថ្កោសទោសចំពោះការធ្វើសមយុទ្ធយោធារួម​គ្នាថ្មី រវាង​ទីក្រុងវ៉ាស៊ីនតោននិង​​ទីក្រុង​សេអ៊ូល​ ដោយថាវាផ្ទុយពីកិច្ចប្រឹងប្រែងដើម្បីឆ្ពោះទៅរកការកសាងសន្តិភាពនៅតំបន់ឧបទ្វីបកូរ៉េ។ នេះបើតាមការដកស្រង់ការផ្សាយ​ចេញពីសារព័ត៌មាន Channel News Asia នៅយប់ថ្ងៃព្រហស្បតិ៍ ទី០៧ ខែមីនា ឆ្នាំ២០១៩។

កាលពីថ្ងៃអាទិត្យ សហរដ្ឋអាមេរិកនិងកូរ៉េខាងត្បូងបាន​ឯកភាពគ្នាយក ការធ្វើសមយុទ្ធយោធាថ្មីមានឈ្មោះថា Dong Maeng (Alliance) ដែលបានចាប់ផ្តើមកាលពីដើមសប្តាហ៍នេះ ជំនួសឲ្យសមយុទ្ធទ្រង់ទ្រាយធំ​ចំនួន០២ គឺ Foal Eagle និង Key Resolve ដែលតែង​ប្រារព្ធ​ឡើងរួមគ្នាក្នុងចន្លោះខែមីនានិងមេសាជារៀងរាល់ឆ្នាំ។ ការសម្រេចធ្វើបែបនេះ គឺដើម្បីបន្តបន្ធូរបន្ថយភាពតានតឹងជាមួយកូរ៉េខាងជើង។

ក៏ប៉ុន្តែទីភ្នាក់ងារព័ត៌មានរដ្ឋកូរ៉េខាងជើង KCNA បានព្រមានថា សមយុទ្ធយោធាថ្មីដែលមានរយៈពេលខ្លីត្រឹមតែ០៩ថ្ងៃនេះ គឺផ្ទុយ​ក៏ដូចជា​​ប្រឆាំងនឹងកិច្ចប្រឹងប្រែងស្វែងរកសន្តិភាពព្រមទាំងស្ថិរភាពនៅឧបទ្វីបកូរ៉េ។ KCNA បានលើកឡើងដូច្នេះថា «សកម្មភាពគួរឲ្យសង្ស័យ​​របស់យោធាអាមេរិកនិងកូរ៉េខាងត្បូង គឺជាការរំលោភលើ​​សេចក្តីថ្លែងការណ៍រួម​រវាងទីក្រុងវ៉ាស៊ីនតោននិងទីក្រុងព្យុងយ៉ាង ព្រមទាំងសេ​ក្តី​ប្រកាសកូរ៉េខាងត្បូង-កូរ៉េខាងជើង ដែលបានប្តេជ្ញារួមគ្នាឆ្ពោះទៅរកការបញ្ចប់សកម្ម​ភាពបង្កហេតុនានា និងបន្ធូរបន្ថយភាពតាន​តឹង​​ផ្នែក​​​​យោធា»​។

គួរជម្រាបថា វត្តមានកងទ័ពអាមេរិកជិត៣០,០០០នាក់ដែលឈរជើងនៅកូរ៉េខាងត្បូង និងការធ្វើសមយុទ្ធយោធាប្រចាំរបស់ពួកគេ​ជាមួយ​កងទ័ពកូរ៉េខាងត្បូងរាប់សែននាក់ តែងតែ​បានធ្វើឲ្យកូរ៉េខាងជើង​រង្គាសចិត្តនៅមិនសុខជាខ្លាំង ដោយទីក្រុងព្យុងយ៉ាងបានថ្កោលទោស​ទង្វើ​ទាំងនេះថា គឺជាការហាតសមដើម្បីឈ្លានពានលើខ្លួននាថ្ងៃណាមួយ៕