(វ៉ាស៊ីនតោន)៖ សហរដ្ឋអាមេរិក​បានបញ្ជូន​យន្តហោះ​ទម្លាក់គ្រាប់បែក​ធុន B-52 ចំនួន​០២គ្រឿង ក្នុងបេសកកម្មដាច់​​ដោយឡែក​ពីគ្នានៅក្បែរ​​ប្រទេសចិន ដែលទង្វើនេះ​ច្បាស់ជានឹងបង្កឲ្យទីក្រុងប៉េកាំង​ ចេញមុខរិះគន់ជាថ្មី​ទៀតជាក់​ជាពុំខាន។ នេះ​បើតាម​ការ​ដកស្រង់ការផ្សាយចេញ​ពីសារព័ត៌មានរុស្ស៊ី Russia Today (RT) នៅរសៀលថ្ងៃពុធ ទី០៦ ខែមីនា ឆ្នាំ២០១៩។​​​

យន្តហោះទម្លាក់​គ្រាប់បែក B-52H Stratofortress ទាំង​០២គ្រឿង​ ដែលមានមូលដ្ឋាន​នៅកោះហ្គាំ​ ស្ថិតនៅមហាសមុទ្រប៉ាស៊ីហ្វិក ​បានចូលរួមក្នុងបេសកកម្ម​ហ្វឹកហ្វឺនជាប្រចាំ​កាលពីថ្ងៃចន្ទ​ដើមសប្តាហ៍នេះ ដោយហោះហើរ​ឆ្លងកាត់ដែនអាកាស​ដែលមាន​បញ្ហាវិវាទនៅ​លើសមុទ្រចិនខាងត្បូង និងសមុទ្រ​ចិនខាងកើត។ បើតាម​សេចក្តីថ្លែងការណ៍របស់​កងទ័ពអាកាស​អាមេរិក​ ប្រចាំ​នៅប៉ាស៊ីហ្វិក ​​B-52 មួយគ្រឿង​បាន​ធ្វើការហ្វឹកហ្វឺន ​នៅក្នុងបរិវេណ​សមុទ្រចិន​ខាងត្បូង ​រីឯមួយ​គ្រឿងទៀត​​ហ្វឹកហាត់​នៅ​ក្បែរ​ឆ្នេរនៃ​ប្រទេសជប៉ុន។

គួរជម្រាបថា បេសកកម្ម Continuous Bomber Presence Mission របស់យោធា​អាមេរិកប្រចាំនៅ​ប៉ាស៊ីហ្វិក ត្រូវបានបង្កើត​ឡើងដើម្បីធានានូវ​សមត្ថភាពប្រយុទ្ធ​ជុំវិញពិភពលោក នៃកងទ័ព​អាកាសរបស់​សហរដ្ឋអាមេរិក និង​ដើរតួនាទី​ជាមធ្យោបាយ​មួយ ដើម្បីទប់ស្កាត់​មិនឲ្យមានការហ៊ាន​ប៉ុនប៉ងវាយប្រហារ​ពីប្រទេសដទៃ។ យ៉ាងណាមិញ ចិនចាត់ទុកការចល័ត​យន្តហោះ​ទម្លាក់គ្រាប់បែកនេះថា គឺជាការបង្ករឿងយ៉ាងជាក់ច្បាស់ និងជាការដំឡើង​សាច់ដុំមួយ ដែលមានគោលដៅ​ប្រឆាំង​នឹង​​អធិប​តេយ្យភាព​របស់ទីក្រុងប៉េកាំង​នៅ​ក្នុងតំបន់៕