(សេអ៊ូល)៖ សហរដ្ឋអាមេរិកនិងកូរ៉េខាងត្បូងនឹងចាប់ផ្តើមបើកការធ្វើសមយុទ្ធយោធាថ្មីហៅថា «Dong Maeng» នាថ្ងៃចន្ទស្អែកនេះ ដើម្បី​ជំនួសសមយុទ្ធយោធាទ្រង់ទ្រាយធំ Foal Eagle និង Key Resolve ដែលប្រទេសទាំងពីរទើបតែបានប្រកាសថាឈប់ធ្វើទៀតហើយ។ នេះ​បើតាមការដកស្រង់ការផ្សាយចេញពីទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅរសៀលថ្ងៃអាទិត្យ ទី០៣ ខែមីនា ឆ្នាំ២០១៩។

បើតាមសេចក្តីប្រកាសព័ត៌មានរួមរបស់សេនាធិការចម្រុះកូរ៉េខាងត្បូង និងទីបញ្ជាការកងកម្លាំងអាមេរិក-កូរ៉ខាងត្បូង សមយុទ្ធយោធាថ្មីនេះ​ ត្រូវបានកែសម្រួលនិងកាត់បន្ថយទំហំពីសមយុទ្ធចាស់ គឺ Foal Eagle និង Key Resolve ហើយនឹងផ្តោតសំខាន់ទៅលើផ្នែកយុទ្ធសាស្រ្ត​និង​ប្រតិបត្តិការនៃប្រតិបត្តិការយោធាទូទៅនៅឧបទ្វីបកូរ៉េ។​ សមយុទ្ធ Dong Maeng ដែលមានន័យថា «សម្ព័ន្ធភាព» នេះ នឹងប្រព្រឹត្តទៅរយៈ​ពេល០៩ថ្ងៃ គឺរហូតដល់ថ្ងៃទី១២ ខែមីនា។

គួរជម្រាបថា នាព្រឹកថ្ងៃអាទិត្យដដែលនេះ ទីក្រុងវ៉ាស៊ីនតោននិងទីក្រុងសេអ៊ូល​ បានសម្រេចចិត្តបញ្ឈប់ការដឹកនាំធ្វើសមយុទ្ធ Foal Eagle និង Key Resolve ហើយងាកទៅផ្តោតលើកម្មវិធីហ្វឹកហ្វឺនសមត្ថភាពនិងលំហាត់យោធារួមថ្មី ដែលមានទំហំតូចៗវិញ ក្រោមគោល​ដៅ​រក្សា​នូវ​​​កិច្ចចរចាបញ្ហានុយក្លេអ៊ែរជាមួយកូរ៉េខាងជើង តែស្របពេលជាមួយគ្នាក៏អាចរក្សានូវសមត្ថភាពត្រៀមលក្ខណៈរបស់យោធានៃសម្ព័ន្ធមិត្ត​ទាំងពីរផងដែរ៕