(វ៉ាស៊ីនតោន)៖ សហរដ្ឋអាមេរិក និងកូរ៉េខាងត្បូង បានសម្រេចថានឹងធ្វើការបន្ថយទំហំនៃការធ្វើសមយុទ្ធយោធាប្រចាំឆ្នាំ ដែលកន្លងមកតែមានទ្រង់ទ្រាយធំ នាំឲ្យកក្រើកឧបទ្វីបកូរ៉េ ខណៈចំណាត់ការដែលនឹងសម្រេចជាផ្លូវការនាពេលខាងមុខនេះ ត្រូវបានគេមើលឃើញថា ជាការគោរពដល់កិច្ចព្រមព្រៀងកន្លងមកជាមួយកូរ៉េខាងជើង បើទោះបីជាកិច្ចប្រជុំកំពូល ត្រាំ-គីម លើកទីបីត្រូវបានបញ្ចប់ទៅដោយភាពបរាជ័យក៏ដោយ។ នេះបើតាមការចេញផ្សាយសារព័ត៌មានចិន ស៊ីនហួរ នាល្ងាចថ្ងៃសៅរ៍ ទី០២ ខែកុម្ភៈ ឆ្នាំ២០១៩។
សម្រាប់សមយុទ្ធយោធាប្រចាំឆ្នាំដែលត្រូវបានសម្រេច ឲ្យបន្ថយទំហំនោះមានដូចជា Key Resolve និង Foal Eagle ដែលត្រូវបានប្តូរឈ្មោះមកត្រឹមជាការហ្វឹហ្វឹកជំនាញធម្មតាវិញ។ នេះបើតាមការចេញផ្សាយដោយសារព័ត៌មានអាមេរិក NBC ដែលត្រូវបានដកស្រង់នៅថ្ងៃសៅរ៍នេះ ក្រោយកិច្ចប្រជុំរវាងមន្ត្រីតំណាងក្រសួងការពារជាតិ នៃសហរដ្ឋអាមេរិក និងប្រទេសកូរ៉េខាងត្បូង។ ជាច្រើនឆ្នាំកន្លងមក កូរ៉េខាងជើងតែងតែបានចាត់ទុកថា សមយុទ្ធខាងលើនេះ គឺមានចេតនាឈ្លានពានខ្លួន និងបានព្រមានវាយបកវិញជារឿយៗ។
ទោះបីជាមានការលើកឡើងថា វាជាការធ្វើឡើងដើម្បីកុំឲ្យប៉ះពាល់ដល់កូរ៉េខាងជើងក៏ដោយ ក៏មន្ត្រីការពារជាតិនៃប្រទេសទាំងពីរ បានថ្លែងរួមគ្នាក្នុងសន្និសីទសារព័ត៌មាននៃទីក្រុងវ៉ាស៊ីនតោនថា សេចក្តីសម្រេចនេះគឺមិនពាក់ព័ន្ធទៅនឹងជំនួបកំពូលលើកទីពីររវាង លោកប្រធានាធិបតី ដូណាល់ ត្រាំ និងលោក គីម ជុងអ៊ុន ដែលបានបរាជ័យនៅវៀតណាមនោះឡើយ ព្រោះប្រទេសទាំងពីរបានពិភាក្សាគ្នានាពេលកន្លងមករួចហើយ ខណៈកត្តាចំណាយទៅលើការធ្វើសមយុទ្ធរាល់ដង គឺជាបញ្ហាចម្បងដែលរដ្ឋបាល ត្រាំ ចង់កាត់បន្ថយ៕
