​(វ៉ាស៊ីនតោន)៖ យានអវកាសអាមេរិក​ដំបូងគេ​បំផុត ​ដែលមានសមត្ថភាពដឹកអវកាសយានិក ចាប់តាំងពី​ការចូលនិវត្តន៍​នៃយាន Space Shuttle ត្រូវបានបាញ់​បង្ហោះហើយនៅទាបភ្លឺ​ថ្ងៃសៅរ៍នេះ (ពេលវេលា​នៅអាមេរិក ត្រូវនឹង​រសៀលថ្ងៃសៅរ៍នេះ ពេលវេលា​នៅ​កម្ពុជា) ដោយគ្រាប់រ៉ុក្កែតរបស់ក្រុមហ៊ុន SpaceX។ នេះបើតា​មការចេញផ្សាយដោយ​សារព័ត៌មាន New York Times នៅរសៀលថ្ងៃសៅរ៍ ទី០២ ខែមីនា ឆ្នាំ២០១៩។

យានអវកាស​ផលិតដោយ​ក្រុមហ៊ុន SpaceX ឈ្មោះថា Crew Dragon ត្រូវបានបាញ់​បង្ហោះនៅម៉ោង ២៖៤៩នាទីរំលងអធ្រាត្រ (ម៉ោងនៅតំបន់​​ភាគខាងកើត​សហរដ្ឋអាមេរិក​ដែលស្មើនឹង​ម៉ោងជិត ០៣រសៀល​នៅកម្ពុជា) ចេញពី​មជ្ឈម​ណ្ឌល Kennedy Space Center ក្នុងរដ្ឋ Florida របស់ទីភ្នាក់ងារ​​អវកាស​អាមេរិក NASA តាមរយៈគ្រាប់​​រ៉ុក្កែត Falcon 9 ដើម្បីឆ្ពោះ​ទៅ​កាន់​ស្ថានីយ​​អវកាស​​អន្តរជាតិ ISS​។

ពុំមានវត្តមាន​ក្រុម​​អវកាសយានិកនៅ​ក្នុងយាន Dragon នេះទេ ខណៈមានអវកាស​​សិប្ប​និម្មិតម្នាក់ឈ្មោះ​ថា Ripley ដែលជាតួអង្គ​ឯកក្នុង​​កម្រងខ្សែភាពយន្ត​ព្រឺព្រួច-វិទ្យាសាស្រ្ត​បែបក្លាស៊ិក​ ដ៏ល្បីរបស់​ហូលីវូដ Alien​។ ​អវកាសយានិក​​សិប្បនិម្មិត​នេះ មានបំពាក់​ប្រព័ន្ធ Sensor ដែលនឹងស្ទាបស្ទង់​ក៏ដូច​ជាវាស់វែង​​ទៅលើ​​កម្លាំង ​ល្បឿន​ ព្រមទាំង​​​​បរិស្ថានជុំវិញ ដែល​មនុស្សជា​អវកាសយានិក នឹងត្រូវឆ្លងកាត់​នាពេល​ខាងមុខ នៅក្នុង​យាន​អវកាសនេះ។

គួរបញ្ជាក់ថា ការបាញ់បង្ហោះនេះ​គឺជាជំហានដ៏សំខាន់មួយនៃក្ដី​សម័យរបស់ស្ថាបនិក​ក្រុមហ៊ុន SpaceX លោក Elon Musk ដែលធ្លាប់​បាននិយាយថា ក្រុមហ៊ុនអវកាស​របស់លោកនឹងនាំ​មនុស្សទៅ​កាន់ទីអវកាស៕