(វ៉ាស៊ីនតោន)៖ ប្រធានាធិបតីអាមេរិកលោក ដូណាល់ ត្រាំ បាននិយាយថា លោកបានស្នើឱ្យចិនលុបចោលរាល់ពន្ធទាំងឡាយលើផលិត ផលកសិកម្មអាមេរិកជាបន្ទាន់ ដោយសារតែលោកបានសម្រេចចិត្តពន្យារពេលការតម្លៃពន្ធលើទីក្រុងប៉េកាំង ដែលដំបូងឡើយត្រូវ ចូលជាធរមាននៅថ្ងៃទី០១ ខែមីនា។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃសៅរ៍ ទី០២ ខែមីនា ឆ្នាំ២០១៩។
តាមរយៈបណ្តាញសង្គម Twitter នៅថ្ងៃសុក្រសប្ដាហ៍នេះ លោក ដូណាល់ ត្រាំ បានគូសបញ្ជាក់យ៉ាងដូច្នេះថា «ខ្ញុំបានសុំឱ្យចិនលុបចោលជាបន្ទាន់ នូវរាល់ពន្ធទាំងអស់លើផលិតផលកសិកម្មរបស់យើង (ក្នុងនោះរួមមានទាំងសាច់គោ និងសាច់ជ្រូកជាដើម) ដោយឈរលើមូលដ្ឋាននៃកិច្ចពិភាក្សាពាណិជ្ជកម្ម... ហើយនេះគឺជារឿងដ៏សំខាន់សម្រាប់កសិករដ៏អស្ចារ្យរបស់យើង និងខ្ញុំ!»។
គួរជម្រាបថា ប្រទេសចិន និងសហរដ្ឋអាមេរិកបានចាប់ផ្ដើមធ្វើសង្រ្គាមដាក់ដំឡើងពន្ធដាក់គ្នទៅវិញទៅមក កាលពីខែមិថុនា ឆ្នាំ២០១៨ ពោលគឺបន្ទាប់ពីលោក ត្រាំ ប្រកាសដំឡើងពន្ធ ៥០ពាន់លានដុល្លារ លើផលិតផលនាំចូលពីចិនជាច្រើនមុខ ដើម្បីកាត់បន្ថយឱនភាពពាណិជ្ជកម្មជាមួយប្រទេសចិន។ ប៉ុន្តែខណៈនេះប្រទេសទាំង ២ កំពុងស្ថិតក្នុងដំណាក់កាលចរចាពាណិជ្ជកម្ម ប្រធានាធិបតីអាមេរិករូបនេះបានសម្រេចចិត្ត ពន្យារពេលការដំឡើងពន្ធ ២០០ ពាន់លានដុល្លារលើផលិតផលចិន ដែលដំបូងឡើយត្រូវផុតកំណត់នៅថ្ងៃទី០១ ខែមីនានេះ៕
