(ហាណូយ)៖ កិច្ចប្រជុំកំពូល​ជាលើកទី ២ នៅក្នុងទីក្រុង​ហាណូយរវាងប្រធានាធិបតី​អាមេរិក​លោក ដូណាល់​​ ត្រាំ និងមេដឹកនាំកំពូលកូរ៉េខាងជើង​លោក​ គីម ជុងអ៊ុន បានបញ្ចប់ទៅ​ដោយ​តក់ក្រហលនៅរសៀល​ថ្ងៃព្រហស្បតិ៍នេះ ដោយពុំមាន​​កិច្ចព្រមព្រៀងអ្វី​នោះឡើយ ក្រៅពីការសន្យាថា​នឹងអាចជួបគ្នា​នៅថ្ងៃអនាគត​ទៀត។ នេះបើតាម​ការចេញផ្សាយ​ដោយសារព័ត៌មាន CNN នៅរសៀលថ្ងៃព្រហស្បតិ៍ ទី២៨ ខែកុម្ភៈ ឆ្នាំ២០១៩។

អ្នកនាំពាក្យ​សេតវិមាន លោកស្រី សារ៉ាហ៍ សេនដឺស (Sarah Sanders) បានគូសបញ្ជាក់យ៉ាងដូច្នេះថា «គ្មានកិច្ចព្រមព្រៀង​ណាមួយត្រូវធ្វើឡើង​នាពេលនេះ​ទេ ប៉ុន្តែក្រុមការងារ​នៃប្រទេសទាំង ២ នឹងជួបគ្នានៅពេលអនាគត»។ តែទោះ​ជាយ៉ាងនេះក្ដី លោកស្រី Sanders បន្ថែមថា «លោក​ប្រធានាធិបតី ដូណាល់ ត្រាំ និងមេដឹកនាំ​កូរ៉េខាងជើង​លោក គីម ជុងអ៊ុន ពិតជាបានពិភាក្សាគ្នា​ក្នុងលក្ខណៈស្ថាបនា​ក្នុងជំនួប​កំពូលនៅទីក្រុង​ហាណូយ ប្រទេសវៀតណាម​ពីថ្ងៃទី២៧ ដល់ថ្ងៃទី២៨ ខែកុម្ភៈនេះ»។

គួរបញ្ជាក់ថា សេចក្តីប្រកាស​ដោយសេតវិមានអាមេរិក​ខាងលើនេះ បានធ្វើឡើងក្រោយ ពីមាន​ព័ត៌មាន​ថា កាលវិភាគ​នៃជំនួប​រវាងមេដឹកនំា​ទាំង​ពីរត្រូវបានផ្លាស់​ប្ដូរភា្លមៗ រីឯជំនួប​ទទួល​ទានអាហារពេលល្ងាច​ ក៏ត្រូវបានលុបចោល​ដោយមិនបញ្ជាក់​មូលហេតុថែមទៀត និងសេចក្តីរាយការណ៍​ដ៏រសើបបំផុត​មួយទៀត នោះ​ទិន្នន័យ​របស់ក្រុមហ៊ុនដឹក​ជញ្ជូន Refinitiv អំពីនាវា​ដឹកប្រេង​មួយគ្រឿងរបស់​វៀតណាម បានដឹកជញ្ជូន​ប្រេងសាំង ២,០០០តោន​​ទៅកាន់ប្រទេស​កូរ៉េខាងជើង កាលពីថ្ងៃទី២៥ ខែកុម្ភៈ ដែលនេះអាច​ជាទង្វើរំលោភ​លើ​ទណ្ឌកម្មអន្តរជាតិ ដឹកនាំ​ដោយ​សហរដ្ឋអាមេរិក​ប្រឆាំង​ទីក្រុង​ព្យុងយ៉ាង៕