(ពិភពលោក)៖ នៅថ្ងៃពុធ ទី២៧ ខែកុម្ភៈ ឆ្នាំ២០១៩នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំង ព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍ រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ នៅទីបំផុតជំនួបកំពូលលើកទីពីររវាងប្រធានាធិបតីអាមេរិក លោក ដូណាល់ត្រាំ និងមេដឹកនាំកំពូលកូរ៉េខាងជើង លោក គីម ជុងអ៊ុន នោះបានចាប់ផ្តើមប្រារព្ធឡើងជាផ្លូវការហើយ នៅក្នុងសណ្ឋាគារ សូហ្វីតែល លីជែន មេត្រូផូល (Sofitel Legend Metropole) ក្នុងទីក្រុងហាណូយ ដែលមានការរៀបចំការពារសន្តិសុខយ៉ាងតឹងរ៉ឹងបំផុត ដោយអាជ្ញាធរវៀតណាម៕
២៖ អាកាសចរណ៍ធំៗពីររបស់វៀតណាមគឺ VietJet និង Bamboo នៅថ្ងៃពុធនេះបានប្រកាសពីកិច្ចព្រមព្រៀងថ្មីមួយ ជាមួយក្រុមហ៊ុនយក្សអាមេរិក Boeing ដែលមានតម្លៃ ១៥ពាន់លានដុល្លារ ដោយក្នុងនោះ Boeing ត្រូវផលិតយន្តហោះ ១១០គ្រឿងឲ្យក្រុមហ៊ុនទាំងពីរនេះ ខណៈដែលសហរដ្ឋអាមេរិក និងវៀតណាមក៏ទើបសម្រេចបាននូវកិច្ចព្រមព្រៀងអនុញ្ញាតការហោះហើរត្រង់ទៅត្រង់មករវាងគ្នាផងដែរ៕
៣៖ សារព័ត៌មានឥណ្ឌានៅថ្ងៃពុធនេះបានចេញផ្សាយថា កងទ័ពអាកាសឥណ្ឌាបានបាញ់ទម្លាក់យន្ដហោះចម្បាំងប៉ាគីស្ថាន មួយគ្រឿងប្រភេទ F16 ជាការសងសឹក ក្រោយពីមានសេចក្ដីរាយការណ៍ថា ប៉ាគីស្ថានទើបបានបាញ់ទម្លាក់យន្ដហោះចម្បាំងឥណ្ឌាពីរគ្រឿង នៅក្នុងដែនអាកាសរបស់ខ្លួននៅតំបន់កាស្មៀរ និងចាប់បានពីឡុតឥណ្ឌាម្នាក់ទៀត៕
៤៖ កងកម្លាំងទ័ពអាកាសប៉ាគីស្ថានបានបាញ់ទម្លាក់យន្ដហោះចម្បាំងឥណ្ឌា២គ្រឿង ដែលបានហោះចូលមកក្នុងដែន អាកាសរបស់ខ្លួននៅថ្ងៃពុធនេះ៕
៥៖ មនុស្សយ៉ាងតិច ២០នាក់បានបាតបង់ជីវិត និងច្រើនជាង៤០នាក់បានរងរបួស នៅពេលអគ្គីភ័យមួយបានឆាបឆេះឡើង នៅស្ថានីយរថភ្លើងធំជាងគេនៅចំកណ្តាលរដ្ឋធានីគែរនៃប្រទេសអេហ្ស៊ីប។
៦៖ មេដឹកនាំគណបក្សប្រឆាំង លោក ជូអាន ហ្គៃដូ (Juan Guaido) ដែលបានប្រកាសតែងតាំងខ្លួនឯងជា ប្រធានាធិបតីស្តីទីវេណេស៊ុយអេឡាដោយមានការគំាទ្រយ៉ាងពេញទំហឹងពីសហរដ្ឋអាមេរិក និងសម្ព័ន្ធមិត្តជាច្រើននោះ អាចនឹងត្រូវប្រឈមមុខជាប់ពន្ធនាគាររយៈពេល ៣០ឆ្នាំ បើលោកហ៊ានចូលមកក្នុងវេណេស៊ុយអេឡាវិញ ដើម្បីឲ្យអាជ្ញាធរទីក្រុងការ៉ាកាស់អនុវត្តន៍តាមនីតិវិធី៕
