(ដាកា)៖ បុរសជនជាតិបង់ក្លាដែសម្នាក់ដែលត្រូវបានបាញ់សម្លាប់ បន្ទាប់ពីរូបគេព្យាយាមប្លន់យន្ដហោះមួយគ្រឿងកាលពីថ្ងៃអាទិត្យ ម្សិលមិញគឺមានតែកាំភ្លើងជ័រនៅក្នុងដៃ និងមិនមានគ្រាប់បែកនៅលើខ្លួនឡើយ។ នេះបើតាមប៉ូលិសបង់ក្លាដែស ដកស្រង់ ការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី២៥ ខែកុម្ភៈ ឆ្នាំ២០១៩។

ថ្លែងប្រាប់សារព័ត៌មាន Reuters នៅថ្ងៃចន្ទនេះ ស្នងការប៉ូលិសប្រចាំទីក្រុង Chittagong ស្ថិតនៅអាគ្នេយ៍នៃប្រទេស លោក Kusum Dewan ឱ្យដឹង​ដូច្នេះថា៖ «កាំភ្លើងដែលជនសង្ស័យកាន់នៅក្នុងដៃគឺគ្រាន់តែជាកាំភ្លើងជ័រ ហើយគាត់ក៏ពុំមាន​គ្រាប់បែក​នៅលើខ្លួនដែរ...គាត់ហាក់ដូចជាបញ្ហាផ្លូវចិត្ត ពីព្រោះយើងបានដឹងថាគាត់មានបញ្ហាគ្រួសារជាមួយភរិយារបស់គាត់ មិនតែប៉ុណ្ណោះ គាត់ថែមទាំងចង់និយាយដោយផ្ទាល់ជាមួយនាយករដ្ឋមន្ត្រីទៀតផង។ ប៉ុន្តែយើងនៅតែបន្តការស៊ើបអង្កេតនៅឡើយ ហើយក៏មិន ចង់ធ្វើការសន្និដ្ឋានណាមួយនៅពេលនេះដែរ»។

គួរបញ្ជាក់ថា ជើងហោះហើរ​លេខ BG 147 ជាកម្មសិទ្ធិ​របស់​អាកាសចរណ៍​បង់ក្លាដែស Biman ដែលគ្រោងហោះហើរ​ពីរដ្ឋធានី​ដាកា ឆ្ពោះទៅកាន់​ទីក្រុងឌូបៃ ត្រូវបង្ខំចិត្ត​ចុះចតជាបន្ទាន់នៅ​ទីក្រុង Chittagong នៃ​ប្រទេស​បង់ក្លាដែសវិញ បន្ទាប់ពីកើតមាន​ករណីអ្នកដំណើរម្នាក់ប៉ុនប៉ងប្លន់យន្តហោះ​ខាងលើនេះ៕