វេណេស៊ុយអេឡាចាប់ផ្តើមបិទព្រំដែនជាមួយកូឡុំប៊ីហើយ ដើម្បីរារាំងចេតនាមេបក្សប្រឆាំងដែលចង់ទៅដឹកជំនួយអាមេរិក ចូលមកក្នុងប្រទេសដោយផ្ទាល់! (Video Inside)
23-02-2019 11:57
(ការ៉ាកាស់)៖ អាជ្ញាធរវេណេស៊ុយអេឡាបានចាប់ផ្តើម បិទច្រកព្រំដែនបីទីតាំងសំខាន់ៗជាមួយប្រទេសកូឡុំប៊ីហើយ ដើម្បីរារាំងជំនួយរបស់សហរដ្ឋអាមេរិក ចូលមកកាន់ប្រទេសអាមេរិកឡាទីនមួយនេះ ខណៈដែលមេបក្សប្រឆាំងលោក ជូអាន ហ្គៃដូ គឺជាអ្នកចេញបទបញ្ជា និងចង់ទៅដឹកនាំជំនួយមកពីអាមេរិកនោះ ចូលមកកាន់វេណេស៊ុយអេឡាដោយផ្ទាល់។ នេះបើតាមការចេញផ្សាយដោយ Sputnik នាព្រឹកថ្ងៃសៅរ៍ ទី២៣ ខែកុម្ភៈ ឆ្នាំ២០១៩។
ជុំវិញចំណាត់ការខាងលើនេះ អនុប្រធានាធិបតីវេណេស៊ុយអេឡាលោកស្រី ឌែលស៊ី រ៉ូទ្រីហ្គែស បានសរសេរបង្ហោះលើបណ្តាញសង្គម Twitter របស់លោកស្រីយ៉ាងដូច្នេះថា «រដ្ឋាភិបាលយើងកំពុងតែធ្វើការរារាំងការគម្រាមកំហែងនានា នៃរដ្ឋាភិបាលកូឡុំប៊ី មកលើសន្តិភាព និងអធិបតេយ្យភាពរបស់វេណេស៊ុយអេឡា... យើងបានសម្រេចចិត្តបិទច្រកស្ពានព្រំដែនបីកន្លែងគឺ Simon Bolivar, Santander និង Union ដែលនៅជាប់កូឡុំប៊ី...»។
គួរបញ្ជាក់ថា ការបិទព្រំដែននេះគឺបន្ទាប់ពីមេបក្សប្រឆាំងវេណេស៊ុយអេឡាលោក ហ្គៃដូ បានប្រកាសប្រើសិទ្ធិជាប្រធានាធិបតីស្តីទី ដែលលោកបានតែងតាំងដោយខ្លួនឯង ទៅដង្ហែរជំនួយមនុស្សធម៌របស់សហរដ្ឋអាមេរិកពីទឹកដីកូឡុំប៊ី ចូលមកកាន់ប្រទេសវេណេស៊ុយអេឡានៅថ្ងៃសៅរ៍ចុងសប្តាហ៍នេះ (ពេលវេលានៅអាមេរិកឡាទីន) ខណៈរដ្ឋាភិបាលលោក ម៉ាឌូរ៉ូ ដែលកំពុងកាន់អំណាចយោធា និងសន្តិសុខ មិនត្រឹមតែបានសម្រេចចិត្តបិទព្រំដែនជាមួយកូឡុំប៊ីនោះទេ លោកថែមទាំងព្រមានបិទព្រំដែនជាមួយប្រេស៊ីលថែមទៀតផង ប្រសិនបើស្ថានការណ៍ចាំបាច់៕
