(តេហេរ៉ង់)៖ ប្រទេសអ៊ីរ៉ង់បានចាប់ផ្តើមការបើកសមយុទ្ធយោធាជើងទឹកទ្រង់ទ្រាយធំនៅលើផ្ទៃទឹកទំហំ​ប្រមាណ០២លានគីឡូ​ម៉ែត្រក្រលា​រវាងឈូងសមុទ្រពែកនិងមហាសមុទ្រឥណ្ឌា។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Russia Today (RT) នៅព្រឹកថ្ងៃសៅរ៍ ទី២៣ ខែកុម្ភៈ ឆ្នាំ២០១៩។

យោធាជើងទឹកអ៊ីរ៉ង់បានលើកឡើងថា សមយុទ្ធយោធាទ្រង់ទ្រាយធំនេះ គឺជាការបង្ហាញឲ្យពិភពលោកបានឃើញពី​​អំណាច​ទ័ពជើងទឹករបស់អ៊ីរ៉ង់ ក៏ដូចជាសមត្ថភាពនៃសព្វាវុធនិងបរិក្ខាយោធាផ្សេងៗ ក្នុងការប្រឈមមុខជាមួយការគំរាមកំហែង​​នានា​នៅក្នុងតំបន់។ នាវាមុជទឹក Fateh និងនាវាពិឃាត Sahand ដែលថ្មីបំផុតរបស់អ៊ីរ៉ង់ ក៏បានចូលរួមក្នុងសមយុទ្ធរយៈពេល០៣ថ្ងៃ​នេះដែរ។ ក្រៅពីនេះ នឹងមានការបាញ់មីស៊ីលព្រមទាំងការហោះហើរនូវក្រុមយន្តហោះដ្រូនស៊ើបការណ៍ ​​និង​ឧទ្ធម្ភាគចក្រ​​ជា​ច្រើន​​គ្រឿង​ថែមទៀតផង។

គួរជម្រាបថា ការបង្ហាញសាច់ដុំយោធាតាមរយៈសមយុទ្ធដែលមានឈ្មោះថា Velayat 97 នេះ កើតមាន នៅចំពេលដែល​ភាព​តានតឹង​រវាង​​អ៊ីរ៉ង់​និងទីក្រុងវ៉ាស៊ីនតោនបានកើនឡើង បន្ទាប់ពីសហរដ្ឋអាមេរិកបានសម្រេចដកខ្លួនចេញពីកិច្ចព្រមព្រៀង​នុយ​ក្លេអ៊ែរ​ឆ្នាំ២០១៥ កាលពីឆ្នាំមុន ហើយទម្លាក់កញ្ចប់ទណ្ឌកម្មមកលើទីក្រុងតេហេរ៉ង់សាជាថ្មីឡើងវិញ៕