(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានសម្រេចជ្រើសតាំងលោកស្រី Kelly Knight Craft ដែលបច្ចុប្បន្ន​ជា​ឯកអគ្គ​រដ្ឋ​ទូតអាមេរិកប្រចាំប្រទេសកាណាដា ធ្វើជាបេក្ខភាពសម្រាប់តំណែងជាឯកអគ្គរដ្ឋទូត​ថ្មីរបស់សហរដ្ឋអាមេរិកប្រចាំ​នៅ​អង្គការសហប្រជាជាតិ (UN)។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅព្រឹកថ្ងៃសៅរ៍ ទី២៣ ខែកុម្ភៈ ឆ្នាំ២០១៩។

សេចក្តីប្រកាសនេះធ្វើឡើងបន្ទាប់ពី អ្នកនាំពាក្យក្រសួងការបរទេស​អាមេរិក លោកស្រី Heather Nauert បានសម្រេច​ដក​ខ្លួន​កាល​ពី​​សប្តាហ៍មុន ចេញពីបេក្ខភាពជាឯកអគ្គរដ្ឋទូតអាមេរិកថ្មីប្រចាំ UN ខណៈលោកស្រី​ផ្ទាល់ក៏ត្រូវបានលោក ត្រាំ ​ជាអ្នក​ជ្រើស​រើស​ផងដែរ។ ជំហានបន្ទាប់ទៀត គឺលោកស្រី Craft ត្រូវរង់ចាំការអនុម័ត​ពី​ព្រឹទ្ធសភា ដើម្បីអាចឡើងកាន់តំណែង​បន្ត​ពី​លោកស្រី Nikki Haley បាន។

គួរជម្រាបថា លោកស្រី Nikki Haley បានប្រកាសលាលែងពីតំណែងឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិ​កាលពីចុងឆ្នាំមុន ហើយពេលនោះ លោក ត្រាំ បានជ្រើសតាំងលោកស្រី Nauert ដើម្បីជំនួសលោកស្រី ក៏ប៉ុន្តែនៅថ្ងៃទី១៦ ខែកុម្ភៈ លោកស្រី Nauert បានប្រកាសដកខ្លួនចេញ ដោយនិយាយថា ប៉ុន្មានខែចុងក្រោយនេះ គ្រួសារលោកស្រីស្ថិត​ក្រោម​សម្ពាធខ្លាំងពេក ដូច្នេះហើយដើម្បីពួកគេ លោកស្រីបានសម្រេចចិត្តសុំដកឈ្មោះចេញតែម្តង៕