(អឺរ៉ុប)៖ សហភាពអឺរ៉ុប (EU) នឹងបញ្ចប់កិច្ចប្រឹងប្រែងចរចាផ្នែកពាណិជ្ជកម្ម​ជាសហរដ្ឋអាមេរិក ប្រសិនបើទីក្រុងវ៉ាស៊ីនតោន​​នៅ​ទីបំផុតសម្រេចអនុវត្តន៍ការយកពន្ធកម្រិតខ្ពស់លើរថយន្តដែលនាំចូលទៅពីអឺរ៉ុប។ នេះបើតាមឧត្តមស្នងការពាណិជ្ជកម្មអឺរ៉ុប​ លោកស្រី Cecilia Malmstrom ដកស្រង់សម្តីដោយទីភ្នាក់ងារព័ត៌មានចិន ស៊ីនហួរ នៅយប់ថ្ងៃសុក្រ ទី២២ ខែកុម្ភៈ ឆ្នាំ២០១៩។

លោកស្រី Malmstrom បានធ្វើការគូសបញ្ជាក់បែបនេះទៅកាន់ក្រុមអ្នកសារព័ត៌មាន នៅមុន​កិច្ចប្រជុំមិនផ្លូវការមួយនាថ្ងៃសុក្រ​សប្តាហ៍នេះ (ពេលវេលាក្នុងតំបន់) រវាង​រដ្ឋមន្រ្តីពាណិជ្ជកម្មនៃបណ្តារដ្ឋជាសមាជិករបស់ EU ដែលនឹងត្រូវជជែកគ្នាទាក់​ទិន​​​នឹង​កិច្ចចរចាពាណិជ្ជកម្មជាមួយសហរដ្ឋអាមេរិក។ លោកស្រី Malmstrom បាននិយាយដូច្នេះថា «កិច្ចចរចានឹងត្រូវបញ្ចប់ភ្លាមៗ​ បើ​អាមេរិក​សម្រេចយកពន្ធកម្រិតខ្ពស់លើ​រថយន្តរបស់អឺរ៉ុប»។

គួរជម្រាបថា កាលពីឆ្នាំ២០១៨ ប្រធានាធិបតីអាមេរិក លោក ដូណាល់ ត្រាំ​ បានគំរាមថានឹងអនុវត្តន៍ចំណាត់ការទារពន្ធក្នុង​​អត្រាខ្ពស់គឺ២៥ភាគរយ​ទៅលើរថយន្ត​នាំចូលពីអឺរ៉ុប ដើម្បីស្តាតុល្យភាពពាណិជ្ជកម្មឡើងវិញ ហើយលោកបានបញ្ជាក់ធ្ងន់ៗ​ថា បើដល់ថ្ងៃផុតកំណត់ គឺថ្ងៃទី០១ ខែមីនា ឆ្នាំ២០១៩ សហភាពអឺរ៉ុប​នៅតែមិនអាចសម្រេចកិច្ចព្រមព្រៀង​សមរម្យ​មួយជាមួយ​អាមេរិកទេនោះ ការយកពន្ធថ្មីនេះនឹងត្រូវអនុវត្តន៍ជាក់ជាពុំខាន៕