​(ដាកា)៖ អាជ្ញាធរបង់ក្លាដែស​នៅថ្ងៃព្រហស្បតិ៍នេះ​បានឱ្យដឹងថា ចំនួនអ្នកស្លាប់​ក្នុងគ្រោះអគ្គីភ័យ​ដ៏សន្ធោសន្ធៅ​ លេបត្របាក់ដ៏​ចំណាស់ជាច្រើននៅ​ក្នុង​រដ្ឋធានី​ដាកា បានកើនដល់ ៨១នាក់ហើយ។ នេះបើតាម​ការចេញផ្សាយ​ដោយ ទីភ្នាក់ងារព័ត៌មានចិន ស៊ីនហួរ នៅរសៀលថ្ងៃព្រហស្បតិ៍ ទី២១ ខែកុម្ភៈ ឆ្នាំ២០១៩។

ជាមួយគ្នា​នោះដែរ ស្នងការប៉ូលិស​ប្រចាំទីក្រុង ដាកា អាលី អាហ្សេម (Dhaka KM Ali Azam) ក៏បានបញ្ជាក់ប្រាប់ស៊ីហួរ​ដែរថា មនុស្ស ៤១នាក់ផ្សេងទៀតកំពុង​សម្រាកព្យាបាល​ នៅតាមមន្ទីរពេទ្យ​ផ្សេងពីគ្នា​នៅក្នុង​ទីក្រុង ខណៈសាកសព​ជនរងគ្រោះ​ត្រូវបាន​រក្សាទុក នៅក្នុង​មន្ទីរពេទ្យទីក្រុង ដាកា (Dhaka Medical College Hospital)។

គួរបញ្ជាក់ថា បើតាម​ព័ត៌មានបឋម គ្រោះអគ្គីភ័យខាងលើ​ទំនងជាបានបង្កឡើង​​ចេញពី​​បំពង់​ហ្គាស​នៅក្នុងអគារស្នាក់នៅមួយកន្លែង ដែលជាទីស្តុកទុក​នូវសារធាតុគីម​ជាច្រើនមុខ ដែលងាយនឹង​ឆាបឆេះ​ផង​ដែរ។ ក្រុមពន្លត់អគ្គិភ័យមកពី ៣៧អង្គភាព បានចូលរួម​ក្នុង​ប្រតិបត្តិការពន្លត់ភ្លើង​ដ៏អាក្រក់នេះ រហូតដល់ម៉ោង ៣៖០០នាទីទៀបភ្លឺ ថ្ងៃព្រហស្បតិ៍នេះ (ម៉ោងនៅរដ្ឋធានីដាកា)៕